საქართველოს შინაგან საქმეთა მინისტრმა საოკუპაციო რეჟიმის მორიგ პროვოკაციულ ქმედებებთან და განცხადებებთან დაკავშირებით პირველი კომენტარი ზუგდიდში გააკეთა.
“ჩვენ კონტროლირებად ტერიტორიაზე გავაკეთეთ საგუშაგო და მაგათ არც უნდა შევკითხებოდით, მაშინ გადმოსწიეს სადღაც 800 მეტრი, თუ რაღაცა… ჩვენი პრევენციული ღინისძიება მუშაობს და მაქსიმალურად ვცდილობთ, რომ არ ჩაგვითრიონ დაძაბვაში, არ მოხდეს რამე შეტაკება ან სროლები. ეს არის ყველაზე მთავარი”, – განაცხადა გომელაურმა.
მისი განცხადებით, ჟურნალისტებს ადგილზე შესვლის უფლება იმიტომ არ ეძლევათ, რომ ევროკავშირის დამკვირვებელი დააკავეს და გადაიყვანეს ცხინვალში და იგივე შეიძლება მოხდეს ჟურნალისტების მიმართაც.
კითხვაზე – რამდენად უსაფრთხოა იქ მცხოვრები მოსახლეობისთვის ტერიტორია – გომელაური პასუხობს, რომ უსაფრთხო არაა, რადგან იქ მცხოვრებ ადამიანებსაც აკავებენ რუსი ოკუპანტები და შემდეგ მათ უწევთ მოლაპარაკება ცხელი ხაზის გააქტიურება.
“ვმუშაობთ, რა თქმა უნდა, პრევენციულ ღონისძიებებზე, რომ არ მოხდეს შეტაკება და ცეცხლი არ გაიხსნას ან იქითა მხრიდან ან აქედან დაა არ გადაიზარდოს უფრო ფართომასშტაბიან ოპერაციაში,” – განაცხადა ვახტანგ გომელაურმა.
“ცუდია რომ ამბობენ, გაავლებენ ღობეს, დაკარგა სახელმწიფომ კიდევ ტერიტორიები. ეს ტერიტორიები ჩვენ 2008 წლის ომის შემდეგ დავკარგეთ. სადაც ღობე არ არის, იქ გადავდივართ, შევდივართ? ვერა. დაკეტილია. ღობე იქნება იქ, თუ რუსული ჯარი იდგება, ჩემთვის ერთი და იგივეა. რა თქმა უნდა სამწუხაროა, რომ ღობეს ავლებენ და გამყოფ ხაზს აკეთებენ, მაგრამ ის, რომ ხელისუფლებამ კიდევ 500 მეტრი დაკარგა, არასწორია” – განაცხადა გომელაურმა