გამოცხადდება თუ არა მასწავლებელთა და მასწავლებლობის მსურველთა გამოცდების პერიოდში საჯარო სკოლებში დასვენების დღეები? ეს კითხვა აქტუალური გახდა მას შემდეგ, რაც გამოქვეყნდა საგნის გამოცდის, საგნობრივი და პროფესიული კომპეტენციების დადასტურების ტესტირების ჩატარების ვადები.
ტესტირება 2 ნოემბერს დაიწყება და 8 ნოემბერს დასრულდება. შეფასებისა და გამოცდების ეროვნულ ცენტრს ჯერ საგამოცდო ცენტრების ჩამონათვალი არ გამოუქვეყნებია, თუმცა ყველასთვის ცნობილია, რომ ზაფხულის პერიოდში გამოცდების ჩატარების ლოკაცია სწორედ საჯარო სკოლების შენობებია.
საქართველოს განათლების, მეცნიერების, კულტურისა და სპორტის სამინისტროში აცხადებენ, რომ გადაწყვეტილება არდადეგების გამოცხადების შესახებ მიღებული არ არის.
„როგორც ცნობილია, არდადეგები მინისტრის ბრძანებით უკვე გაწერილია და იქ ეს პერიოდი არ გახლავთ მოხსენიებული. თუმცა, როგორც იცით, მინისტრს ბოლო ცვლილებით მიეცა დისკრეციის წესით ბრძანების გამოცემის უფლება სწორედ არდადეგებთან მიმართებაში, თუმცა ჯერ ასეთი გადაწყვეტილება მიღებული არ არის და თუ იქნება, საზოგადოებას ეცნობება“, – აცხადებენ უწყებაში .