“საერთაშორისო გამჭვირვალობა- საქართველოს” მიერ ჩატარებული კვლევის მიხედვით, სამეგრელო-ზემო სვანეთის მხარის მუნიციპალიტეტების 40-ზე მეტი დეკლარაციიდან დარღვევები 16-ში გამოვლინდა, მათ შორის: დეკლარაციის არასრულად შევსების 12 ფაქტი და საკუთარი წილის სხვა პირისთვის გადაუცემლობის 11 შემთხვევა. როგორც კვლევაშია მითითებული, ზუგდიდის მერის პირველ მოადგილეს, გიგა ფარულავას დეკლარაცია 2019 წლის თებერვალში აქვს შევსებული, დეკლარაციაში არა აქვს აღნიშნული, რომ მამამისი გიორგი ფარულავა შპს “როკონას” 100%-იანი წილის მფლობელი და დირექტორია.

ზუგდიდის მუნიციპალიტეტის საკრებულოს თავმჯდომარეს მამუკა წოწერიას დეკლარაცია 2018 წლის ოქტომბერში აქვს შევსებული, სადაც მითითებული აქვს, რომ შპს “ზუგდიდის ეთერზეთების კომპანიის” 100% წილის მფლობელია, თუმცა, კანონის მოთხოვნის მიუხედავად, მას აღნიშნული წილი მართვის უფლებით სხვა პირისთვის არ აქვს გადაცემული.

საკრებულოს თავმჯდომარის მოადგილეს დეკლარაცია 2019 წლის იანვარში აქვს შევსებული,სადაც აღნიშნული აქვს, რომ შპს “ლაზიკას” 100% წილის მფლობელია, თუმცა, კანონის მოთხოვნის მიუხედავად, მას აღნიშნული წილი მართვის უფლებით სხვა პირისთვის არ აქვს გადაცემული.კვლევაში ასევე აღნიშნულია, რომ ბესიკ ჭეჟიამ “ქართულ ოცნებას” 2014 წელს 2 500 ლარი შესწირა.

ორგანიზაცია მიმართავს საჯარო სამსახურის ბიუროს, შეისწავლოს კვლევაში აღნიშნული პირების ქონებრივი დეკლარაციები და მოახდინოს რეაგირება.