„26 წლის წინ ჩვენ დაგვატოვებინეს სახლები, ჩვენი მშობლიური მიწა, უსაყვარლესი მხარე და საკუთარ ქვეყანაში ვიქეცით დევნილებად. 10 დღე-ღამეა, რაც ჩვენ მივმართეთ პროტესტის უკიდურეს ფორმას და ვიმყოფებით მუდმივად სამინისტროს ფოიეში. ჩვენი კანონიერი და საფუძვლიანი მოთხოვნები დღემდე უგულვებელყოფილია სამინისტროს წარმომადგენელთა მიერ. – აცხადებენ დევნილები, რომლებიც უკვე 10 დღეა ჯანდაცვის სამინისტროში იმყოფებიან და თავშესაფრით უზრუნველყოფას ითხოვენ.

აქციის მონაწილეებს ამ დრომდე არ შეხვედრია დევნილთა, შრომის, ჯანმრთელობისა და სოციალური დაცვის მინისტრი, რომელიც თავის ნაცვლად მათ უგზავნის სამინისტროს სხვადასხვა თანამშრომლებს, რომელთაც არა თუ არა აქვთ პასუხი მათ მიერ დასმულ კითხვებსა და მოთხოვნებზე, არამედ ავლენენ დამოკიდებულებას, რომელსაც დევნილები ახასიათებენ როგორც ,,უპასუხისმგებლო’ს, ცინიკურს, არაადამიანურსა და არაპროფესიონალურს”

სამინისტროში და პირადად მინისტრს ავიწყდებათ, რომ ჩვენი გადახდილი გადასახადებიდან იღებენ ხელფასს და ვალდებულები არიან, იზრუნონ ჩვენი პრობლემების მოგვარებაზე,“ – აცხადებს აფხაზეთიდან დევნილი ნინო ბუკია ,,ინტერპრესნიუსთან” საუბარში.

აქციის მონაწილეები ამბობენ, რომ თუკი მათი მოთხოვნები ორშაბათამდე არ დაკმაყოფილდა, პროტესტი ფორმას შეიცვლის და გახდება კიდევ უფრო უკიდურესი, ამასთან, საკითხებს დაემატება მინისტრისა და მისი მოადგილეების დაუყონებლივი გადადგომის მოთხოვნა.