ევროსასამართლოს მოსამართლეთა შესარჩევი კომიტეტის სხდომაზე ევროსასამართლოში საქართველოდან წარდგენილი სამივე მოსამართლის კანდიდატურა ჩავარდა. აღნიშნული საკითხის განხილვას კომიტეტი მომავალი წლის იანვარში დაუბრუნდება. შესაძლოა კომიტეტმა სია უკან დააბრუნოს და ახალი შემადგენლობის დასახელება მოითხოვოს.
,, კანდიდატების ასეთი ჩავარდნა ძალიან იშვიათად ხდება. საქართველოს მთავრობის მიერ წარდგენილი სამკაციანი სია სამარცხვინო პროცესის შედეგად დააკომპლექტა თეა წულუკიანმა, ივანიშვილის მთავრობას მთელი ეს ვითომ ევროპულობის იმიტაცია თავზე დაემხო. მთავრობის შეცვლის შემდეგ ახალი მთავრობა ჩაატარებს ინკლუზიურ, სამართლიან კონკურსს და სტრასბურგის სასამართლოში ნამდვილად ღირსეულ კანდიდატებს წარადგენს.''- აცხადებს ერთიანი ნაციონალური მოძრაობის წარმომადგენელი გიორგი კანდელაკი.
სახალხო დამცველი უჩა ნანუაშვილი სტრასბურგის სასამართლოს მიერს შერჩევის პროცესის ბუნდოვანობას უკავშირებს.
”არ არის გამორიცხული სტრასბურგში კითხვები სწორედ ამან გააჩინა, რომ წარდგენილი იყვნენ ის კანდიდატები, ვისაც შერჩევის დაბალი ქულები ქონდათ დაწერილი. აქ ალბათ პრობლემა არის იმასთან დაკავშირებით, თუ რამდენად იყო გამჭვირვალე კანდიდატების შერჩევის პროცესი, ვინ შეარჩია ზოგადად ეს სამი კანდიდატურა. ზოგიერთ კანდიდატს უფრო მეტი ქულა ქონდა, მაგრამ საბოლოო ჯამში მოხდა სამი კანდიდატის წარდგენა.. რა თქმა უნდა, კითხვის ნიშნები რჩება, თუ რა პრინციპით იხელმძღვანელა მთავრობამ, როდესაც კანდიდატები წარადგინა. მთავრობას უფრო მეტად უნდა განემარტა ის მიზეზები, თუ რატომ მოხდა ამ კანდიდატების წარდგენა. ამ შერჩევის პროცესში შესაძლოა იკვეთებოდეს გარკვეული ინტერესი, ან სურვილი, რომ სტრასბურგში ის კანდიდატები ყოფილიყვნენ წარდგენილები, ვისაც ხელისუფლება ენდობა. ”, – აცხადებს უჩა ნანუაშვილი.