ყოფილმა პრემიერმა დღეს საქართველოს პრეზიდენტი კიდევ ერთხელ გააკრიტიკა და მედიის წარმომადგენლებთან შეხვედრაზე განაცხადა, რომ გიორგი მარგველაშვილი საკუთარი განცხადებებით ხშირად ასხამს წყალს „ნაციონალური მოძრაობის“ წისქვილზე, თუმცა იქვე დასძინა, რომ პრეზიდენტი „ნაციონალების“ კაცი არ არის, რადგან მათთვისაც (ენმ-სთვის) არა არის სასარგებლო.
ივანიშვილი ლევან მურუსიძის სკანდალის შექმნაში ოპოზიციას და "მათ მიერ კონტროლირებად ტელევიზიებს" ადანაშაულებს. "ეს თემაც (ლევან მურუსიძის სკანდალი) მათი ანგაჟირებულია. თავისი პოზიციებით, ბევრი ჩაერთო ამ პროცესში, მათ შორის პრეზიდენტიც, მათ წისქვილზე ხშირად ასხამს წყალს, მაგრამ არ მგონია, რომ ის მათი კაცი იყოს, ის მათთვისაც არ არის დიდად სასარგებლო“, – განაცხადა ივანიშვილმა.
ბიძინა ივანიშვილი პრემიერისა და პრეზიდენტის ურთიერთობაზეც და ასევე მისი მხრიდან პრეზიდენტის მისამართით გამოთქმულ ჯანსაღ კრიტიკაზეც გაამახვილა ყურადღება.
„მხოლოდ სწორი კრიტიკით, შეცდომებზე მინიშნებით შეიძლება გამოასწორო ადამიანიც და ინსტიტუტიც. რასაც მაგალითად დავით ბერძენიშვილი ტრაბახობს, რომ პრეზიდენტი და მისი ინსტიტუტი არასდროს გაუკრიტიკებია და ამით ამაგრებს მის ინსტიტუტს, პირიქით, ამით დათვურ სამსხურს უწევთ. თუ შენ გინდა ინსტიტუტი ძლიერი იყოს, ოღონდ არგუმენტირებული და სწორი კრიტიკა უნდა ახლდეს მას და დღესაც ნებისმიერი შემიძლია გავიმეორო, იქიდან ვერცერთი პასუხი ვერ მოვისმინე დღესაც, რომ იმ არგუმენტებზე არგუმენტირებულად რომ ეპასუხა პრეზიდენტის სამსახურს ან მას თვითონ, რომ მე ვცოდავდი და სწორი არ ვიყავი,“ – აღნიშნავს პრემიერი.
მისი შეფასებით, კვირიკაშვილმა უფრო "დაბალანსებული პოლიტიკა აირჩია".
„კვირიკაშვილმა რომ ნახა, რომ პრეზიდენტსაც და მის მეხოტბეებსაც, რომლებსაც ჰგონიათ რომ ინსტიტუტს ამაგრებენ, პატივს არ სცემენ ამ ინსტიტუტს საკუთარი ქცევით, მან კრიტიკა შეაჩერა და გაყვა. კავკასიური ცარცის წრე თუ გახსოვთ, ფინალში ბავშვი, კვირიკაშვილმა აჩვენა, რომ ჭეშმარიტად უყვარს ის ბავშვი, რასაც საქართველო ქვია და ის რომ გაგლეჯას ცდილობს, გადააყოლა რამდენიმე მომენტში, თუმცა სტრატეგიულად. კვირიკაშვილთან მე თანახმა არ ვიყავი, როდესაც ამ საკითხზე პოზიციებს ვათანხმებდით თავის დროზე და დღესაც არ ვარ თანახმა, მაგრამ გააკეთა ისე, როგორც თვითონ ფიქრობდა და არა ისე მე რომ მინდოდა,“ – აღნიშნავს ივანიშვილი.