დეპუტატი თამაზ მეჭიაური  კომპოზიტორ ჯემალ სეფიაშვილსა და დიასპორის საკითხებში სახელმწიფო მინისტრის ყოფილ მოადგილესთან  სანდრო ბრეგაძესთან ერთად ქმნის ახალ პარტიას  სახელწოდებით ”თამაზ მეჭიაური – ერთიანი საქართველოსთვის”.  

მისი თქმით, პარტიაში ასევე იქნებიან ”ქართული ოცნების” ახალგაზრდული გუნდის დაფუძნებელი დავით ფაცაცია, ჟურნალისტი ლალი მოროშკინა და  ამირან რობაქიძის დედა ია მეტრეველი.თამაზ მეჭიაური ადასტურებს, აგრეთვე, რომ  თანამშრომლობა შესთავაზა ბიზნესმენ ლევან ვაძაძესაც, თუმცა ჯერ პასუხი არ მიუღია და აცხადებს, რომ  მიესალმება, თუკი ლევან ვასაძე მისი გუნდის წევრი იქნება.

”უარს არ ვიტყვით, თუკი ჩვენთან ითანაშრომლებს. ეროვნულ საკითხებში ჩვენი ხედვები ემთხვევა და მის ფინანსებს სუნი არ ასდის. ახლოს მყოფი ხედვები გვაქვს და მივესალმები, თუკი თანამშრომლობა შედგება”, – განაცხადა თამაზ მეჭიაურმა. 

ის, რომ თავისი  პარტიის შექმნას გეგმავს თამაზ მეჭიაურს ბოლო ორი თვეა არაერთგზის აქვს განცხადებული. ერთერთ ინტერვიუში, რომელიც მან ამ თემაზე მაისის მიწურულს მისცა  “მაესტროს” იგი შეეხო  ლევან ვასაძესთან შესაძლო  თანამშრომლობის საკითხსაც.  ,,მე დიდი სიამოვნებით ვითანამშრომლებდი მასთან. შევთავაზებდი, რომ ის უფრო წინ ყოფილიყო და ამ საქმეს სათავეში ჩადგომოდა. მე არ მაქვს რამე ახირება, რომ აუცილებლად პირველი ვიყო, ჩემთვის მთავარია შედეგი მივიღოთ. მასთან არ მისაუბრია და ჩემი დღევანდელი გამოსვლა შეუძლია მოწოდებად ჩათვალოს. შეთავაზებას ვუკეთებ, რადგან მასთან ბევრი მოსაზრება მაქვს თანხვედრაში,”- განაცხადა მაშინ თამაზ მეჭიაურმა.

დეპუტატის განმარტებით, პარტია პროქართული იქნება:   უპირველესად  ორიენტირებული ეროვნულ ინტერესზე, ქვეყნის მთავარი ინტერესი კი არის ტერიტორიული მთლიანობის აღდგენა. ”