ზუგდიდის მუნიციპალიტეტის საკრებულოს სხდომაზე დღეს ურთიერთშელაპარაკება გამოიწვია 22 მაისს შუალედურ არჩევნებში კორცხელის 54-ე უბანზე მომხდარი ინციდენტის შესახებ "ნაციონალური მოძრაობის" მხრიდან გაკეთებულმა განცხადებამ. ფრაქციი წევრმა კახაბერ ჩანგელიამ საკრებულოს უმრავლესობის წევრებს კორცხელის ინციდენტი შეახსენა და განაცხადა, რომ "ამ ფაქტის შესახებ ოფიციალური განცხადება უნდა გაეკეთებინათ ადგილობრივი ხელისუფლების წარმომადგენლებს, თუმცა ეს აქამდე არ მომხდარა, ეს იმას ნიშნავს, რომ გუბერნატორი, გამგებელი და საკრებულოს თავმჯდომარე პატივს არ სცემენ ამომრჩეველს, თუმცა ამის პასუხს ისინი მიიღებენ 8 ოქტომბერს.კიდევ ერთხელ დიდი მადლობა კორცხელის მოსახლეობას, რომ გამოიჩინეს საკმაო გონიერება და არ აყვნენ "ქართული ოცნების" პროვოკაციას, რომელსაც ჩაფიქრებული ქონდა, რომ არჩევნებზე გამოეწვია ქაოსი". ნაციონალური მოძრაობის წევრის განცხადებას ფრაქცია "ქართული ოცნების" წევრი მაიზერ ნანავა გამოეხმაურა, რომელმაც განაცხადა, რომ "ქართული ოცნება" გმობს ყველანაირ ძალადობას "ის ბიჭები, ვინც კორცხელში იყვნენ ჩამოსულები, იყვნენ "ქართული ოცნების" მხარდამჭერები, თუმცა ამ დაპირისპირების მიზეზი იყო ის, რომ ნაციონალური მოძრაობის მხარდამჭერებმა პროვოცირება გაუკეთეს ამ ყველაფერს, რასაც სამწუხაროდ მოჰყვა ჩხუბი, რასაც გმობს ხელისუფლება, ვაღიარებთ ამ შეცდომას და ამის მაგალითია ის, რომ ამ ადამიანების მიმართ აღძრულია საქმე"- განაცხადა მაიზერ ნანავამ.