,,ზაალ ლატარია თავს დამნაშავედ არ სცნობს, მისი დაკითხვა არ მომხდარა, – აცხადებს პირადი ცხოვრების ამსახველი ვიდეოჩანაწერის შენახვისა და მასობრივად გავრცელების საქმეზე დაკავებულის ადვოკატი ვახტანგ იაშვილი
ადვოკატი მისი დაცვის ქვეშ მყოფს მცხეთის დროებითი დაკავების იზოლატორში ახლახანს შეხვდა.
როგორც იაშვილი განმარტავს, ლატარია დაკავებას მის პოლიტიკურ აქტიურობას უკავშირებს.
ზაალ ლატარიას მიმართ აღკვეთის ღონისძიების შეფარდებაზე თბილისის საქალაქო სასამართლოში დღეს, 16:30 საათზე იმსჯელებენ.
„ზაალ ლატარია დაკავებას წინასაარჩევნო პერიოდში, როგორც პირველ, ასევე მეორე ტურში მის პოლიტიკურ აქტიურობას უკავშირებს. ჩემი დაცვის ქვეშ მყოფის ინფორმაციით, ოპოზიციურ გაერთიანებებთან ახლო ურთიერთობის გამო შესაძლოა, განხორციელდა პროვოკაცია.
როგორც ჩემთვის ცნობილია, პროკურატურა დღეს სასამართლოში ლატარიას პატიმრობას მოითხოვს, ბუნებრივია, ჩვენ ამას არ დავეთანხმებით“, – აცხადებს იაშვილი.
სავარაუდოდ, ის სასამართლოს ზაალ ლატარიას მიმართ აღკვეთის ღონისძიების პატიმრობის გირაოს სანაცვლოდ შეცვლის შუამდგომლობით მიმართავს.
ზაალ ლატარიას ბრალი ოფიციალურად გუშინ წაუყენეს. შინაგან საქმეთა სამინისტროს ინფორმაციით, სამართალდამცველებმა, ვიდეოჩანაწერის შენახვისა და გავრცელების ბრალდებით, კიდევ ერთი პირი – 1975 წელს დაბადებული ზ.ლ. დააკავეს. პოლიციამ ბრალდებულის საცხოვრებელ სახლში მოსამართლის განჩინების საფუძველზე ჩხრეკა ჩაატარა.
შეგახსენებთ, რომ პირადი ცხოვრების ამსახველი ჩანაწერების გავრცელების საქმეზე მიმდინარე გამოძიების ფარგლებში, სულ 18 პირია დაკავებული