ვანო მერაბიშვილი ბადრაგის თანხლებით თბილისის ერთ-ერთი კლინიკიდან ე.წ. მატროსოვის ციხეში ღამით დააბრუნეს.
საავადმყოფოში ყოფილი პრემიერი და შინაგან საქმეთა ყოფილი მინისტრი ორი საათის განმავლობაში ინტენსიური თერაპიის განყოფილებაში იყო მოთავსებული.
მიზეზი ამჯერადაც სასუნთქი გზების პრობლემება, თუმცა კონკრეტულად რა სახის სამედიცინო მანიპულაცია თუ კვლევა ჩაუტარდა მას, უცნობია.
ადვოკატი პასუხს დიაგნოზთან დაკავშირებით სასჯელაღსრულების დაწესებულებიდან ამ დრომდე ელოდება. ბოლო პერიოდში ეს მერაბიშვილის ჯანმრთელობის დამძიმების და ჰოსპიტალიზების უკვე მესამე შემთხვევაა.
ერთი თვის წინ მსგავსი ფაქტის შემდეგ ვანო მერაბიშვილს მკურნალობის კურსი დაენიშნა, თუმცა როგორც ჩანს ეს მკურნალობა უშედეგო აღმოჩნდა.
"შედეგი არ გამოიღო ამ პერიოდში მკურნალობამ. ორ თვეზე მეტია უკვე მიმდინარეობს. შესაბამისად ჩვენ მოვითხოვეთ რომ მომხდარიყო მისი ხელახლა გამოკვლევა, რაზეც დაგვთანხმდნენ და მოხდა მისი გადაყვანა. ამავდროულად მიწერილი გაქვს სასჯელაღსრულების დაწესებულებისთვის, რომ გვაცნობონ წინა შემთხვევებში როდესაც მოხდა მისი გაყვანა გამოკვლევის მიზნით რა დიაგნოზი იქნა დასმული. აღნიშნულთან დაკავშირებით ჯერ პასუხი არ მიგვიღია. შესაბამისად ვიმედოვნებთ, რომ უახლოეს დღეებში ისინი მოგვაწვდიან ამ ინფორმაციას. რაც შეეხება მის ჯანმრთელობის მდგომარეობას, ის კვლავ ცუდად არის. არანაირი შედეგი არ ქონია ამ ორთვიან მკურნალობას. ბუნებრივია, გვაქვს განცდა, რომ არ მოხდა ჯეროვნად მისი გამოკვლევა. ან არასწორი დიაგნოზირება იყო თავის დროზე გაკეთებული,“-განაცხადა ვანო მერაბიშვილის ადვოკატმა გიორგი ჩივიაშვილმა.