რუსეთის პრეზიდენტის გრანტით დაფინანსებული მედია-ფორუმი დღეს იხსნება. ღონისძიება მთავარი მომხსენებლების გარეშე ჩაივლის. ისინი საქართველოში არ შემოუშვეს. ამ მიზეზით ღონისძიებას ვერ დაესწრებიან „იტარ-ტასის“ სამხედრო მიმომხილველები ვიქტორ ლიტოვკინი და ალექსანდრე ტოკარევი, რუსეთის საზოგადოების მკვლევართა ასოციაციის საერთაშორისო საბჭოს პრეზიდენტი გენადი ბორდიუგოვი და გაზეთ “ჩრდილოეთ ოსეთის” მთავარი რედაქტორი ალან კოსაევი.
მედიის როლი რეგიონში ნდობის აღდგენაში,- ასეთია ღონისძიების ოფიციალური სახელწოდება.
გვიან ღამით თბილისში ფორუმის კიდევ ერთი მონაწილე, ჟურნალისტი დიმიტრი კოსირევი ჩამოვიდა.
„კონფერენციის ორგანიზატორები ჩემი მეგობრები არიან. მათ მკითხეს, მინდოდა თუ არა კიდევ ერთხელ თბილისში ჩამოსვლა.
რა თქმა უნდა, ჩვენ ყოველთვის გვინდა თბილისში ჩამოსვლა. მითუმეტეს , რომ ფორუმის თემა ჩემთვის ძალიან საინტერესოა.
ბევრი შემიძლია ვილაპარაკო, როგორ იმართება თანამედროვე მსოფლიოში ტვინის გამორეცხვის კამპანია და ინფორმაციის ტოტალური ფალსიფიცირება.
რაც შეეხება კონფლიქტის ისტორიას, პირადად ჩემთვის არ არსებობს საკმარისი ფაქტები. მახსოვს რომ 2008 წელს პრესას არ დავუჯერე და დავურეკე ჩემს მეგობრებს თბილისში, მათ ვინაობას ვერ გავამხელ, მაგრამ მითხრეს, რომ ცეცხლი საქართველომ გახსნა.
ოკუპაციას რაც შეეხება, ჩვენ ნამდვილად არაფერში გვჭირდება სამხრეთ ოსეთი და აფხაზეთი. ჩვენ ყოველთვის ვიცოდით რომ იქ ცხოვრობს განსხვავებული ხალხი, რომელსაც თავისი კანონები აქვს. ეს ტერიტორიები არ გვჭირდება, ჩვენ ისედაც საკმარისი გვაქვს. აჯობებს თავად გაარკვიოთ ვინ ვისი ოკუპაცია მოახდინა“-ამბობს დიმიტრი კოსირევი..
