„მე ვიცავ უკრაინისა და ჩვენი ხალხის ინტერესებს. ჩვენ თავს დაგვესხნენ და ჩვენ გვაქვს თავდაცვის უფლება“ — ასე გამოეხმაურა უკრაინის პრეზიდენტი ვოლოდიმირ ზელენსკი ტრამპის სიტყვებს, რომ მასთან მოლაპარაკება უფრო რთულია, ვიდრე პუტინთან.
ბრიუსელში მიმდინარე პრესკონფერენციაზე უკრაინის პრეზიდენტი ამბობს, რომ უკრაინის შეიარაღებული ძალებისთვის Starlink-ის მუშაობაზე დაწესებული შეზღუდვები ამ დრომდე სრულად არ არის მოხსნილი, თუმცა SpaceX-ის ინტერნეტის სიჩქარეს თანდათან აბრუნებენ. მისივე თქმით, სადაზვერვო მონაცემებს უკრაინას ათობით ქვეყანა უზიარებს, თუმცა ბალისტიკური რაკეტების გაშვების შესახებ მხოლოდ შეერთებულ შტატებს შეუძლია მოხსენების წარდგენა.
„პუტინს ჩვენი განადგურება სურს. ის ნამდვილად თვლის, რომ ჩვენ არ ვართ ქვეყანა და არც ხალხი. თქვენ ნამდვილად გჯერათ, რომ მას მხოლოდ ჩვენი ქვეყნის აღმოსავლეთი ნაწილი სურს?“ — აღნიშნა ზელენსკიმ ჟურნალისტებთან.