უკრაინის უპილოტო სისტემების ძალებმა (СБС) გასული 24 საათის განმავლობაში რუსეთის სამხედრო და ლოგისტიკურ ინფრასტრუქტურაზე დარტყმების ახალი სერია განახორციელეს.

СБС-ის სარდლის, რობერტ „მადიარ“ ბროვდის განცხადებით, ანაპის რაიონში განადგურებულია რუსეთის საზღვაო ავიაციის Su-33 ტიპის გემბანის გამანადგურებელი და Mi-8 ვერტმფრენი.

გელენჯიკის რაიონში უკრაინული დრონების სამიზნე გახდა ორი მნიშვნელოვანი სარადარო კომპლექსი — „Каста-2Е2“ და 92Н6, ეს უკანასკნელი S-300/S-400 საჰაერო თავდაცვის სისტემების შემადგენლობაში გამოიყენება.

ბროვდის ინფორმაციით, დარტყმები განხორციელდა ნოვოროსიისკის სამხედრო-საზღვაო ბაზაზეც, სადაც რამდენიმე სამხედრო ხომალდი, მათ შორის სარაკეტო შეიარაღების მატარებელი გემები დაზიანდა.

ამავე დროს, შავ ზღვაში გრძელდება СБС-ის ოპერაცია „МоЛоЧКа“, რომლის სამიზნეც რუსეთის საზღვაო ლოგისტიკაა. ბროვდის განცხადებით, ბოლო დღე-ღამეში დარტყმა მიაყენეს რუსეთის ე.წ. „ჩრდილოვანი ფლოტის“ 13 მცურავ საშუალებას. ეს ოპერაცია უკრაინულმა მხარემ ჯერ კიდევ ივლისში დაიწყო და აგვისტოს დასაწყისისთვის 218 სხვადასხვა მცურავ საშუალებაზე დარტყმის შესახებ აცხადებდა.

СБС-ის სარდალმა ფრონტზე რუსული ძალების დანაკარგების საკუთარი სტატისტიკაც გამოაქვეყნა. მისი მონაცემებით, 1–8 სექტემბერს უპილოტო სისტემების ძალებმა 3 395 რუსი სამხედრო „დააზიანეს“ — ამ კატეგორიაში СБС დაღუპულებსა და დაჭრილებს აერთიანებს.

ბროვდის განცხადებით, სექტემბრის პირველი რვა დღის განმავლობაში რუსული ცოცხალი ძალის საშუალო დღიური დანაკარგი 411 სამხედრო იყო, აგვისტოს საშუალო მაჩვენებელი კი 355-ს შეადგენდა — ზრდა დაახლოებით 16%-ია.

აღსანიშნავია, რომ Su-33 რუსეთისთვის განსაკუთრებით მწირი რესურსია — ეს საბჭოთა წარმოშობის გემბანის გამანადგურებელია, რომელიც ავიამზიდ „ადმირალ კუზნეცოვისთვის“ შეიქმნა. უკრაინული СБС რუსულ Su-33-ზე წარმატებული დარტყმის შესახებ 23 აგვისტოსაც აცხადებდა — მაშინ სამიზნე ვიტიაზევოს რაიონში მდებარეობდა და იმავე ოპერაციისას MiG-29-სა და სხვა სამხედრო ობიექტებსაც დაარტყეს.