ე.წ პიჯაკების საქმის არსებითი განხილვა გრძელდება. დღეს პროცესზე თემურ ჯანაშიას ადვოკატმა საპარალამენტო უმრავლესობის წევრის და იურიდიული კომიტეტის თავმჯდომარის ეკა ბესელიას დაკითხვა მოითხოვა. დაცვის მხარე ამტკიცებს,რომ ბესელიას მიერ საჯარო სივრცეში გაკეთებული განცხადება, რომ საქმეზე გამამტყუნებელი განაჩენი დადგება ,ბადებს ეჭვს წინასწარ დაწერილი გადაწყვეტილების შესახებ.
მოსამართლემ დაცვის მხარის შუამდგომლობა არ დააკმაყოფილა, რის შემდეგაც ადვოკატებმა მოსამართლის აცილების შუამდგომლობა დააყენეს. თუმცა მათი მოთხოვნა არც ამ შემთხვევაში დაკმაყოფილდა.
თემურ ჯანაშია აცხადებს, რომ მას სამართლიან სასამართლოში მონაწილეობის უფლება ერთმევა.
„ეკა ბესელიამ პირდაპირ ფეხქვეშ გათელა უდანაშაულობის პრეზუმფცია და თქვა, რომ საქმეზე სადაც განხილვები მიმდინარეობს, დამდგარია გამამტყუნებელი განაჩენი თავისუფლების აღკვეთა არის სასჯელად დანიშნული.
ამაზე კლასიკური შემთხვევა უდანაშაულობის პრეზუმფციის ფეხქვეშ გათელვის არ არსებობს.
გვაქვს გონივრული ეჭვი, რომ ეკა ბესელიას ეს განცხადება ეფუძნებოდა სასამართლო ხელისუფლებისგან წინასწარ მიღებულ დაპირებას“-აცხადებს თემურ ჯანაშიას ადვოკატი ბექა ბასილაია.
საქმის პროკურორი, გიორგი მუჯირი კი ამბობს, რომ დაცვის მხარის შუამდგომლობა გასცდა სამართლებრივ ჩარჩოებს. პროკურორის თქმით, საჯაროდ გაკეთებული განცხადება ვერასოდეს იქნება სისხლის სამართლის საქმეზე განსჯის საგანი.