ჩვენი პასუხები რუსეთის მიერ ომის გაჭიანურებასა და ჩვენს ქალაქებსა თუ თემებზე მიტანილ დარტყმებზე სრულიად სამართლიანია. ამჯერად უკრაინულმა შორ მანძილზე მოქმედმა “სანქციებმა” მოსკოვის რეგიონს მიაღწია და ჩვენ მკაფიოდ ვეუბნებით რუსებს: მათმა სახელმწიფომ უნდა დაასრულოს თავისი ომი. უკრაინული დრონებისა და რაკეტების მწარმოებლები აგრძელებენ მუშაობას. მადლობელი ვარ უკრაინის უსაფრთხოების სამსახურის და უკრაინის თავდაცვის ძალების ასეთი სიზუსტისთვის. დისტანცია უკრაინის სახელმწიფო საზღვრიდან – 500 კმ-ზე მეტია. რუსული საჰაერო თავდაცვის კონცენტრაცია მოსკოვის რეგიონში ყველაზე დიდია, თუმცა ჩვენ ამას ვძლევთ. დიდება უკრაინას!“- დაწერა სოციალურ ქსელში უკრაინის პრეზიდენტმა ვოლოდიმირ ზელენსკიმ.
რუსეთის უკრაინაში სრულმასშტაბიანი შეჭრის შემდეგ გასულ ღამეს მოსკოვზე ყველაზე მასშტაბური იერიში მიიტანეს. რუსული მხარის ინფორმაციით, დაიღუპა 3 ადამიანი, 12 კი დაშავდა. თავდასხმა 10-ზე მეტ ობიექტზე მოხდა, თუმცა, სავარაუდოდ, არის ისეთი ობიექტებიც, რომლის შესახებაც ინფორმაცია ჯერჯერობით არ გავრცელებულა. უკრაინული მედიის ცნობით, მოსკოვსა და რუსეთის რეგიონებს 500-ზე მეტი დრონი დაესხა თავს. რუსეთში ტრანსნეფტის უმსხვილესი ნავთობის საცავი იწვის, ასევე უკრაინამ მოსკოვის ოლქში შერემეტიევოს აეროპორტი და ნავთობპროდუქტების სატუმბი სადგური, მოსკოვში კი ნავთობგადამამუშავებელი ქარხანა დაბომბა.