უპილოტო საფრენი აპარატები ოჩაჩირის, სოხუმისა და გულრიფშის თავზე – ვიდეოებს აფხაზეთის მარიონეტული საგანგებო სიტუაციების სამინისტრო ავრცელებს. მათივე განცხადებით, უპილოტოები შენიშნეს ასევე ადლერშიც, რის გამოც ჩაკეტილი იყო სასაზღვრო-გამშვები პუნქტი ფსოუზე.

თავდაპირველად გავრცელებული ინფორმაცია დადასტურდა ოჩამჩირეში, სადაც დრონი ელექტროგადამცემ ხაზს დაეცა და დააზიანა. აფხაზურმა და რუსულმა ტელეგრამ-არხებმა ფოტოებიც გამოაქვეყნეს. საგანგებო სიტუაციების მარიონეტულმა სამინისტრომ მოსახლეობა გააფრთხილა, რომ თუ ნახავდნენ დრონის ნამსხვრევებს, არ მიახლოებოდნენ მათ და შეეტყობინებინათ სამართალდამცველებისთვის. 

ამავდროულად, გავრცელდა კადრები, სადაც ჩანს, როგორ მიფრინავს ზღვის მხარეს უპილოტო საფრენი აპარატი და სავარაუდოდ, ფეთქდება. როგორვ გაირკვა, ეს გულრიფშის რაიონის სოფელი ფშაფი აღმოჩნდა. ეს სოფელი სოხუმის აეროპრტიდან რამდენიმე კილომეტრში მდებარეობს, ასე რომ, შეიძლება ვარაუდი: დრონების ინტერესის ობიექტი სოხუმის აეროპორტი იყო. 

ამ ეტაპზე შეზღუდვა მოხსნილია ფსოუზე და სეპარატისტთა სასაზღვრო-გამშვები პუნქტი ჩვეულებრივ რეჟიმში მუშაობს. 

მეტი ამბები უფრო ოპერატიულად და მუდმივი განახლების რეჟიმში ქვეყნდება ჩვენს ტელეგრამ-არხზე: https://t.me/zgdtvo