ზაზა სარალიძე კვირის ბოლომდე შსს-გან ქმედით ნაბიჯებს ელოდება. ხორავას ქუჩაზე მოკლული დავთ სარალიძის მამა ამბობს, რომ მას უწყებაში დღევანდელ შეხვედრაზე საქმის დეტალები გააცნეს, მათშორის საუბარი შეეხო მიხეილ კალანდიასაც.მისი თქმით, ამ შეხვედრიდან მისთვის ცნობილი გახდა, რომ ძალიან მალე მას აღარ ექნება კითხვები გამოძიებასთან. „კონკრეტულ პირებზე კონკრეტული ბრალდებები უკვე დამტკიცებულია, კონკრეტული მოწმეების ჩვენებების საფუძველზე,“ – განაცხადა ზაზა სარალიძემ.ზაზა სარალიძე ამბობს, რომ მისთვის მოულოდნელი იყო ის, რომ დღევანდელ შეხვედრაზე დაინახა სერიოზული ნაბიჯები, რომელსაც შსს დგამს. შესაბამისად, კითხვაზე, რა იქნება მაშინ, თუ კვირის ბოლომდე არაფერი შეიცვალა, ის ამბობს, რომ მალე მას სამომავლო გეგმა აღარ დასჭირდება.„დარწმუნებული ვარ, რომ კვირის ბოლოს ისეთ ნაბიჯებს გადადგამენ, რომ არანაირი გეგმა არ მექნება შემდგომში,“ – განაცხადა ზაზა სარალიძემ.მისივე თქმით, ის, რომ გამოძიება წინ წავიდა, დიდწილად დამსახურებაა საგამოძიებო კომისიის მუშაობის, რომელმაც ბევრი დეტალი გამოკვეთა საქმეში.
ზაზა სარალიძის განცხადებით, თავდაპირველად მისი მოთხოვნა მირზა სუბელიანის დასჯა იყო, მაგრამ გამოძიების მსვლელობიდან გამომდინარე, მას შეუძლია, თქვას, რომ საქმე შეიძლება, ხელისუფლების უფრო მაღალ თანამდებობის პირებამდე მივიდეს.
„უფრო დიდზე გადის ეს დანაშაულებრივი წვლილი. საერთოდ სხვა ადამიანებზე გადის, შესაძლებელია მაღალი თანამდებობის პირებზე,“ – განაცხადა ზაზა სარალიძემ.