მეცნიერ-მკვლევარი, ისტორიკოსი, არქეოლოგი გოგიტა ჩიტაია, რომელსაც არცთუ ვიწრო წრეში ხობელ შლიმანს ეძახიან და სულ ახლახან კიდევ ერთხელ გაახარა ფართო მკითხველი თავისი მშვნიერი წიგნით ,, ხობის სიძველენი'' , თავის პირად ფეისბუქგვერდზე გვაცნობს ბიოლოგ ვასო გაბუნიას ძალზე მნიშვნელოვან ინიციატივას.
ეს ინიციატივა უკავშირდება ხობის ტერიტორიაზე ნაპოვნ არაერთ ბუნებრივ ქმნილებას, რომელიც, ბიოლოგის დასკვნით, არის კონკრეციები და სეპტარიები, რასაც წესით ბუნების ძეგლის სტატუსი უნდა მიენიჭოს.
,, ხობის მონასტრის მიდამოებში დიდი რაოდენობით შევნიშნეთ გაქვავებული მოლუსკები – მათ შორის განსაკუთრებით დიდი ზომის კარგად დაცული ამონიტი, რომელიც ჯავშნიანი, უხერხემლოთა კლასის თავფეხიან მოლუსკებს მიეკუთვნება. მსგავსი მოლუსკები დინოზავრების დროს ოკეანეებში ბინადრობდნენ, ამჟამად კი მათი ნახვა ქვად ქცეული სახით არის შესაძლებელი – ამბობს ბიოლოგი – ჩვენი ამონიტები ძალიან კარგადაა დაცული და, შესაბამისად, საინტერესო იქნება დამთვალიერებლებისათვის
გოგიტა ჩიტაია თვლის, რომ სასურველია და აუცილებელიც, ერთი მაინც დაიდოს ზუგდიდის ბოტანიკურ ბაღში, რამდენადაც ტურისტებისა და მეცნიერებისათვის ძალიან საინტერესო ექსპონატი იქნება.
,, ვფიქრობთ, აუცილებელია მათი გადატანა უსაფრთხო ადგილას. სამწუხაროდ, ბუნების ამ იშვიათი საოცრების აღება ჩემს ძალებს აღემატება'' – ამბობს გოგიტა ჩიტაია, მას იქვე ეხმაურებიან “ბოტანიკური ბაღების მართვის ცენტრის” უფროსი ზვიად ქარჩავა, რომელსაც დიდი გეგმები აქვს ბოტანიკური ბაღის ფუნქციონალური დატვირთვის გაზრდის მიმართულებით, და ზუგდოდის მერიის კულტურული მემკვიდრეობის განყოფილების უფროსი, ისტორიკოსი ლაშა ჯიქია. ამ ადამიანების ერთობლივი ძალისხმევით ერთერთი მოლუსკი, იმედია , უახლოეს დროში გადმოინაცვლებს ამ ბაღში.
ხობი ყოველთვის იყო სამეგრელოს (და არამხოლოდ) დონორი სიძველეთა დაცვისა და გაზიარების მხრივ. რაც შეეხება იმას, რომ მსგავსი ექსპონატები უფრო ეფექტურად გამოიყურება ბუნებრივ გარემოში, ხობში სხვაც არაერთი მოლუსკია ნაპოვნი და იქ მათ გოგიტა ჩიტაიას და ვასო გაბუნიას მსგავსი ადამიანების ხელი და თვალი არასოდეს მოაკლდება.
