ბრიუსელში 15-საათიანი მოლაპარაკებების შემდეგ, ევროკავშირმა დაამტკიცა გადაწყვეტილება უკრაინის დაფინანსების შესახებ 2026–2027 წლებისთვის, საერთო ჯამში 90 მილიარდი ევროს ოდენობით. ამის შესახებ სოციალურ ქსელ X-ში ევროპული საბჭოს პრეზიდენტმა ანტონიუ კოშტამ განაცხადა.
„ჩვენ შეთანხმებას მივაღწიეთ. მიღებულია გადაწყვეტილება, უკრაინისთვის 2026–2027 წლებში 90 მილიარდი ევროს ოდენობის მხარდაჭერის გაწევის შესახებ. ჩვენ დავპირდით და შევასრულეთ“, — განაცხადა მან.
გადაწყვეტილებას გამოეხმაურა გერმანიის კანცლერი ფრიდრიხ მერციც, რომელმაც აღნიშნა, რომ „ეს არის მკაფიო სიგნალი ევროპიდან პუტინისადმი: ეს ომი ამად არ ღირს“. მისივე თქმით, რუსეთის აქტივები გაყინული დარჩება მანამ, სანამ რუსეთი უკრაინას კომპენსაციას არ გადაუხდის.
თავის მხრივ, ევროკომისიის პრეზიდენტმა ურსულა ფონ დერ ლაიენმა აღნიშნა, რომ მექანიზმი იმუშავებს „რეპარაციული კრედიტის“ პრინციპით: უკრაინა ვალდებული იქნება დააბრუნოს ეს თანხები მხოლოდ მას შემდეგ, რაც რუსეთი რეპარაციებს გადაიხდის. მანამდე გაყინული რუსული აქტივები დაბლოკილი დარჩება, ხოლო ევროკავშირი იტოვებს უფლებას, არსებული ფულადი ნაშთები ამ კრედიტის დასაფინანსებლად გამოიყენოს.
„ჩვენ შევიკრიბეთ მკაფიო მიზნით – გადავჭრათ უკრაინის ფინანსური საჭიროებები მომდევნო ორი წლის განმავლობაში, და მოხარული ვარ გაცნობოთ, რომ ამას მივაღწიეთ. ჩვენ შევთანხმდით გადაწყვეტილებაზე, რომელიც საშუალებას იძლევა ეს საჭიროებები სრულად დაკმაყოფილდეს“, — განაცხადა ფონ დერ ლაიენმა.