უკრაინულ დრონებს იგერიებდნენ ღამით მოსკოვსა და მოსკოვის გარეუბნებში. ქალაქის მერის განცხადებით 15 დრონი ჩამოაგდეს. ღამით ორჯერ შეაჩერეს ფრენები დომოდედოვოსა და ჟუკოვსკის აეროპორტებში. ადგილობრივებმა მოსკოვის გარეუბნებიდან სოციალურ ქსელებში ვიდეოები გაავრცელეს, სადაც აფეთქების შემდეგ კვამლი ჩანს.

სოციალურ ქსელებში გავრცელებული ინფორმაციით, რუსეთის დედაქალაქზე დრონებით შეტევა 15 დეკემბრის ღამეს მოხდა.

რუსული ტელეგრამ-არხების ცნობით, აფეთქებების ხმა მოსკოვის ოლქის ისტრის რაიონში ისმოდა. 

სობიანინის განცხადებით, საგანგებო სამსახურების სპეციალისტები ჩამოვარდნილი ნამსხვრევების ადგილებზე მუშაობენ.

არსებული ინფორმაციის თანახმად, შეტევა მოსკოვზე 14 დეკემბრის საღამოდან გრძელდება. მანამდე აფეთქებებისა და საჰაერო თავდაცვის მოქმედებების შესახებ მოსკოვის ოლქის ქალაქ კაშირის მცხოვრებლებიც ავრცელებდნენ ცნობებს.

დილით რუსეთის თავდაცვის სამინისტრომ განაცხადა, რომ ღამის განმავლობაში 130 დრონი ჩამოაგდეს, მათ შორის 25 – მოსკოვის რეგიონის თავზე.

რუსეთის ქალაქ ბელგოროდში “ბლექაუთი იყო გამოცხადებული”. ღამით დარტყმა განხორციელდა თბო-ელექტროსადგურზე, რის გამოც ქალაქის ნაწილს ელექტრომომარაგება შეუწყდა.