ევროპელ ლიდერებს თეთრ სახლში ვიზიტამდე ვოლოდიმირ ზელენსკიმ ვაშინგტონში, უკრაინის საელჩოში უმასპინძლა. ზელენსკის პოზიციის ძირითადი თეზისები:
“ჩვენი მთავარი მიზანია სანდო და მდგრადი მშვიდობის უზრუნველყოფა უკრაინისა და მთელი ევროპისათვის. მნიშვნელოვანია, რომ ჩვენი ყველა შეხვედრის დინამიკას სწორედ ამ შედეგისკენ მივყავდეთ . ჩვენ გვესმის, რომ პუტინისგან ნებაყოფლობით უარს აგრესიასა და ახალი დაპყრობის მცდელობებზე არ უნდა ველოდოთ. ამიტომ უნდა იმოქმედოს ზეწოლამ — და ეს უნდა იყოს ერთობლივი ზეწოლა — შეერთებული შტატების, ევროპის და მთელი იმ სამყაროს მხრიდან, ვინც პატივს სცემს სიცოცხლის უფლებას და საერთაშორისო წესრიგს”.
“უნდა შევაჩეროთ მკვლელობები. მადლობას ვუხდი ჩვენს პარტნიორებს, რომლებიც სწორედ ამაზე და სანდო, ღირსეულ მშვიდობაზე მუშაობენ. ფინეთის, გაერთიანებული სამეფოს, იტალიის, ევროკომისიისა და ნატოს გენერალურ მდივანთან ერთად, ჩვენ კოორდინაციას ვახდენთ ერთობლივ პოზიციებზე პრეზიდენტ ტრამპთან შეხვედრამდე. უკრაინა მზად არის ნამდვილი ზავისა და ახალი უსაფრთხოების არქიტექტურის ჩამოყალიბებისთვის. ჩვენ გვჭირდება მშვიდობა”.