„ლელოს“ ეს გადაწყვეტილება არის ღალატი პოლიტიკური პატიმრების, საქართველოს თითოეული მოქალაქის და ღალატი ყველა იმ ოპოზიციური პარტიის და სამოქალაქო ჯგუფის, რომელიც იბრძვის რეჟიმის წინააღმდეგ, – ასე აფასებს „ნაციონალური მოძრაობის“ ლიდერი, ანა წითლიძე „ლელო-ძლიერი საქართველოს“ გადაწყვეტილებას, 2025 წლის თვითმმართველობის არჩევნებში მონაწილეობაზე.

მისი თქმით, „ოცნებასთან“ „რუსულ სპეცოპერაციაში მონაწილეობის მიღებისთვის „ლელოს” აუცილებლად მოუწევს პოლიტიკური ფასის გადახდა“.

კიდევ ერთხელ ვიტყვი, რომ „ლელოს” ეს გადაწყვეტილება არის იმ ბრძოლის ღალატი, რა ბრძოლაშიც საქართველოს მოქალაქეები არიან რეჟიმის წინააღმდეგ. ეს არის ღალატი პოლიტიკური პატიმრების, საქართველოს თითოეული მოქალაქის და ღალატი ყველა იმ ოპოზიციური პარტიის და სამოქალაქო ჯგუფის, რომელიც იბრძვის რეჟიმის წინააღმდეგ. “ლელომ” უნდა იცოდეს, რომ მისი მხრიდან ამ გზის არჩევა, რასაც ჰქვია “ოცნებასთან” კოალიციის შექმნა და ამ რუსულ სპეცოპერაციაში მონაწილეობა არის ის, რის საფასურსაც გადაიხდის როგორც საკუთარ ამომრჩეველში, ისე პოლიტიკურ წრეებში. ეს ეტყობა კიდეც იმ პროცესებს, რაც მიმდინარეობს „ლელოში”, სადაც ადამიანები ძალიან ღირსეულად ტოვებენ პოსტებს “ლელოს” იმ გადაწყვეტილების გამო, რაც მათ მიიღეს,” – განაცხადა ანა წითლიძემ.