პარიზის ტერაქტები ორგანიზებულია ისლამური სახელმწიფოს მიერ – ეს განცხადება უშიშროების საბჭოს საგანგებო სხდომის დასრულების შემდეგ ქვეყნის პრეზიდენტმა ფრანსუა ოლანდმა გააკეთა. მან წუხანდელ თავდასხმებს ისლამისტების მიერ გაჩაღებული ომი უწოდა.
ომზე საუბრობენ საფრანგეთის რიგითი მოქალაქეებიც. მოქალაქეები ამბობენ, რომ არსებული ვითარებიდან გამომდინარე გაჩენილი შიში დიდი ხანი გაყვებათ. ფრანგები კურიერთან საუბრობენ და ამბობენ, რომ შოკში არიან და თავს დაცულად ვეღარ გრძნობენ.
პარიზის მოქალაქეები რესპუბლიკის მოედანზე იკრიბებიან, სადაც ტერაქტების დროს დაღუპულების ხსოვნას პატივს მიაგებენ.
ქვეყნის ისტორიაში ყველაზე მასშტაბური თავდასხმების გამო ფრანსუა ოლანდი თურქეთში დიდი ოცეულის სამიტზე აღარ გაემგზავრება. საფრანგეთში საგანგებო მდგომარეობაა გამოცხადებული, ჩაიკეტა ქვეყნის საზღვრები. სპეცსამსახური კი ტერორისტთა თანამზრახველებს ეძებს. დილიდან გამკაცრებულია უსაფრთხოების ზომები პარიზშიც. პარლამენტის შენობას, სკოლებს, რელიგიურ დაწესებულებებსა და ღირსშესანიშნავ ადგილებს პოლიციისა და სამხედროების დამატებითი ქვედანაყოფები იცავენ. ქუჩებში 1500-ზე მეტი სამართალდამცველი პატრულირებს.
ავტორი: თამარ ნუცუბიძე