ბოლო დღეებში მოვარდნილმა წვიმამ კვლავ დააზარალა ზუგდიდის რაიონ სოფელ დარჩელის ტელმანის უბნის მცხოვრებლები. ამ წუთებში ისინი საპროტესტო აქციას მართავენ. როგორც აქციის მონაწილეები აცხადებენ, მდინარე ჯუმის ნაპირების გამაგრების საკითხი მათი გამუდმებული მოთხოვნის მიუხედავად ჭიანურდება, რის გამოც ყოველი წვიმის შემდეგ მოდიდებული მდინარე მორღვეული დამბიდან სოფლის სავარგულებსა და სამოსახლოებში გადმოედინება და საცხოვრებელი სახლების ქვედა სართულებს ტბორავს. ნადგურდება ნათესები, წყალს მიაქვს შინაური ფრინველები და ცხოველები . სოფლის მცხოვრებლები აპროტესტებენ ადგილობრივი ხელისუფლების უყურადღებობას და კატეგორიულად მოითხოვენ ჯუმზე გარღვეული დამბის აღდგენასა და სხვა ნაპირსამაგრი სამუშაოების განხორციელებას. ეს არ არის პირველი საპროტესტო აქცია, რომელსაც ტელმანის უბნის მოსახლეობა ჯუმის გამაგრების მოთხოვნით მართავს. ასეთივე მდგომარეობა შეიქმნა ივნისის დამლევს, როცა ღვარცოფმა მოსახლეობის ყანები და საცხოვრებელი სახლები დაააზარალა, თუმცა დაპირების მიუხედავად ზაფხული ისე გავიდა, ჯუმის მორღვეული დამბისთვის არავის მიუხედავს.