შინაგან საქმეთა სამინისტრომ ამ დრომდე ვერ დაადგინა, თუ ვინ დგას ნარკოტიკებით ინტერნეტ ვაჭრობის უკან.
სკანდალური ჟურნალისტური გამოძიება ამ თემაზე გადაცემა "პოსტ სკრიპტუმმა" მოამზადა, რომლის ფარგლებშიც დადგინდა, რომ ნარკოტიკების, მათ შორის, სასიკვდილო „მეფედრონის“, რეალიზაცია რუსულენოვანი ინტერნეტ გვერდის საშუალებით და ყოველგვარი დაბრკოლების გარეშე ხდება.
ნარკოტიკებს ანონიმური გამსაღებლები თბილისის რამდენიმე უბანში ყიდიან და მომხმარებლებს აკრძალულ ნივთიერებებს, სავარაუდოდ, რამდენიმე ასეულ ადგილას უტოვებენ.
ნარკოტიკული საშუალების შესაძენად ჟურნალისტებს სულ 15 წუთი დასჭირდათ, რეალიზაციის ადგილი კი თბილისის ერთ-ერთი ტურისტული ცენტრი, გუდიაშვილის მოედანი აღმოჩნდა.
შინაგან საქმეთა სამინისტრომ ფაქტზე ძიება პარასკევს დაიწყო, კონკრეტული შედეგები, ჯერჯერობით, უცნობია.
ამასობაში კი სოციალურ ქსელებში ვრცელდება ინფორმაცია, რომ ნარკოტიკების რეალიზაციის ერთერთი ადგილი არის კლუბი ,,ბასიანი'', რომელიც ბერა ივანიშვილის კუთვნილებაშია. აღნიშნულთან დაკავშირებით ექსპრემიერის ვაჟი "ფეისბუქზე" განცხადებას ავრცელებს და უარყოფს უარყოფს გავრცელებულ ინფორმაციას, რომ კლუბი "ბასიანი" მის კუთვნილებაშია.
" კლუბი „ბასიანი“ ჩემი არასდროს ყოფილა, არც რამე კავშირი მაქვს მის მფლობელებთან და არასდროს ვყოფილვარ ამ დაწესებულებაში. პირადად მე და მთელს ჩემს ოჯახს დიდი სურვილი გვაქვს ამ კლუბში მომხდარი „მკვლელობების“ გამოძიებისა და დამნაშავეების სასტიკი დასჯის. იმედია ასეც მოხდება. მე კი გულწრფელად თანავუგრძნობ გარდაცვლილთა ოჯახებს და ვიზიარებ მათ მწუხარებას. მუდამ თქვენი ბერა" – წერს ბერა ივანიშვილი.
შეგახსენებთ, გასულ კვირას, სავარაუდოდ, მძიმე ინტოქსიკაციის შედეგად, რომელიც შესაძლოა გამოწვეული იყოს ახალი ფსიქოაქტიური ნივთიერება "მეფედრონი" იყოს, გარდაიცვალა ორი ახალგაზრდა – 22 წლამდე ასაკის გოგონა და ბიჭი. ასევე გუშინ ცნობილი გახდა, რომ ნარკოტიკული ინტოქსიკაციით კიდევ 2 ახალგაზრდა გარდაიცვალა. როგორც ცნობილია, გარდაცვლილები არიან 38 წლის კახა კიკნაძე და 39 წლის ლევან კალანდაძე. ლევან კალანდაძე კულტურის სამინისტროს პროტოკოლის სამსახურს ხელმძღვანელობდა