თბილისის საკრებულომ მომავალი წლის ბიუჯეტი დაამტკიცა, რომელიც 2 მილიარდ 455 მლნ ლარი იქნება.
2025 წელს განსახორციელებელი პროგრამები და პროექტები ვიცე- მერმა ირაკლი ხმალაძემ წარადგინა.
მისი განცხადებით, აღნიშნული თანხიდან ინფრასტრუქტურის მიმართულებით გათვალისწინებულია 707 მლნ ლარი. კერძოდ: გზები – 155 მლნ ლარი;
სატრანსპორტო ინფრასტრუქტურის მოწესრიგება, მათ შორის ავტობუსების შეძენა – 183 მლნ ლარი; კეთილმოწყობის ღონისძიებები – 86 მლნ ლარი; ხიდები, კოლექტორები, საყრდენი კედლები – 24 მლნ ლარი; ავარიული სახლების გამაგრება- ჩანაცვლება – 21 მლნ ლარი; პარკების მოწყობა-რეაბილიტაცია – 52 მლნ ლარი; თბილისის განვითარების ფონდის პროექტები – 46 მლნ ლარი; სპორტული მოედნები, მათ შორის ვერის კორტების რეაბილიტაცია – 11 მლნ ლარი; ბაღების მშენებლობა-რეაბილიტაცია – 14 მლნ ლარი.
მიმდინარე და საოპერაციო ხარჯებს შორისაა გათვალისწინებული საბავშვო ბაგა-ბაღების სუბსიდია – 218 მლნ ლარი; ტრანსპორტის სუბსიდია – 396 მლნ ლარი; დასუფთავების ღონისძიებებისთვის 125 მლნ ლარი; ჯანდაცვისა და სოციალური მიმართულების პროგრამებისა და პროექტების ჯამური ბიუჯეტია 533 მლნ ლარი.
ხმალაძის განცხადებითვე, დონორების დაფინანსებით განსახორციელებელ პროექტებს შორისაა მდგრადი ურბანული მობილობის პროექტი (KfW), თბილისის მეტროს მოდერნიზაციის პროექტი (EBRD) და თბილისის მეტროს მოდერნიზაციის პროგრამა (მოძრავი შემადგენლობების განახლება) (AIIB). ამ და სხვა პროექტებისთვის დონორების დაფინანსება ჯამურად 100 მლნ ლარს შეადგენს.
მერიის ინფორმაციითვე, მომავალ წელს განსახორციელებელ მსხვილ პროექტებს შორისაა 18- მეტრიანი ავტობუსების შესყიდვის პროექტი, რომელიც გარდამავალია და მომავალ წელს ამისთვის 145 მლნ ლარია გამოყოფილი;
ვერის პარკის რეაბილიტაცია და სამხედრო ქალაქის პარკის მოწყობა; 5 საბავშვო ბაგა-ბაღის მშენებლობა; ნარიყალას ციხის რეაბილიტაცია; ჭადრაკის სასახლის ფასადის რეაბილიტაციისთვის მომდევნო წელს დაიხარჯება 7 მლნ ლარი, რაც შედის მთლიანად რეაბილიტაციისთვის განსაზღვრულ 34 მლნ ლარში.
ხმალაძის თქმით, განხორციელდება კადეტთა კორპუსის რეაბილიტაციის მეორე ეტაპი, გამაგრდება ფერდი წყნეთის გზატკეცილზე; განხორციელდება რუსთაველის გამზირის, ასევე ჭავჭავაძის გამზირი – ბაგების დარჩენილი მონაკვეთის რეაბილიტაცია; ამავე ქუჩებზე მოეწყობა ნარჩენების მიწისქვეშა ურნები და გარე განათება.
პროტესტის ნიშნად, საკრებულოს დღევანდელ სხდომას ოპოზიციურ ფრაქციები არ ესწრებოდნენ. სხდომაზე იმყოფებოდა მერი კალაძე.