გუდაურში ავსტრიელი და ფრანგი ექსპერტები მუშაობენ და უახლოეს დღეებში გახდება ცნობილი წინასწარი შეფასება, თუ რა მოხდა საბაგიროზე.
საქართველოში მსოფლიოში ცნობილი ექსპერტული კომპანია „ბიურო ვერიტასის“ ექპერტთა ჯგუფი დამოუკიდებელ დასკვნას მოამზადებენ და პროკურატურას მიაწვდიან, – ამის შესახებ პირველმა ვიცეპრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა განაცხადა.
მისივე თქმით, საქართველოში უკვე ჩამოფრინდნენ კომპანია „დოპელმაიერის“ წარმომადგენლებიც.
„ძალიან მნიშვნელოვანია, დამოუკიდებელი დასკვნა დაიდოს და დასკვნა არ იყოს მხოლოდ მწარმოებლის ან ქართული მხარის მიერ გაკეთებული. საუბარია ჩვენი ქვეყნის რეპუტაციაზე და აქედან გამომდინარე ყველა შედეგზე“, – განაცხადა დიმიტრი ქუმსიშვილმა.
საერთაშორისო ექსპერტებთან ერთად ამ მიმართულებით ინტენსიურად მუშაობს შინაგან საქმეთა სამინისტროც, თუმცა სავარაუდო მიზეზებისა და გამოძიების პირველადი შედეგების შესახებ ცნობილი არ არის.
გუდაურში უბედური შემთხვევა გუშინ მოხდა. ყაზბეგის მერის ალექსანდრე ზაგაშვილის ინფორმაციით, ძაბვის ვარდნის შედეგად ელექტროენერგია გაითიშა, რის გამოც საბაგირო ავარიულად გაჩერდა, შემდეგ კი საძელე საბაგიროზე სავარძლები ერთმანეთს შეეჯახნენ.
ჯანდაცვის სამინისტროს ოფიციალური ინფორმაციით, ინციდენტის შედეგად სულ 11 ადამიანი დაშავდა., მათგან 4 ამ დრომდე ღუდუშაურის სახელობის კლინიკაში რჩება და შესაბამისი მკურნალობა უტარდება.
ეკონომიკისა და მდგრადი განვითარების სამინისტროს ტურიზმის ეროვნული ადმინისტრაცის ხელმძღვანელი გიორგი ჩოგოვაძე აღნიშნავს, რომ ყველა დაშავებულს მომავალ ზამთრის სეზონზე საქართველოში მოიწვევენ, მათ მოგზაურობას კი ”მთის კურორტების კომპანია” დააფინანსებს. ,,სახელმწიფო აკეთებს ყველაფერს, რომ ამ ადამიანებს და მათ თანმხლებ პირებს მაქსიმალური კომფორტი შევუქმნათ. ძალიან გაგვახარა იმ ფაქტმა, რომ ყველა მათგანი დაინტერესებულია და გამოხატეს ჩვენთან სტუმრობის სურვილი. ქვეყანამ, რა თქმა უნდა, გარკვეული საიმიჯო ზიანი მიიღო ამ ფაქტის გამო. ატურიზმის ადმინისტრაცია და სხვა უწყებები გააათკეცებენ მუშაობას ჩვენი ქვეყნის პოპულარიზაციის და იმიჯის გამოსწორებისთვის, ჟურნალისტების მოწვევა იქნება ეს თუ სარეკლამო კამპანია", – განაცხადა ჩოგოვაძემ.