“საერთაშორისო გამჭვირვალობა – საქართველომ ” 2017 წელს საქართველოს სახელმწიფო რწმუნებულის – გუბერნატორის ცხრა ადმინისტრაციის მიერ გაცემული შრომის ანაზღაურების, პრემიისა და სახელფასო დანამატის, ასევე ადმინისტრაციების მიერ სატელეფონო კომუნიკაციაზე, მივლინებებზე, საწვავზე, კვებისა და რესტორნის მომსახურებაზე გაწეული ხარჯების შესახებ ინფორმაცია გამოაქვეყნა. გასულ წელთან შედარებით, ხარჯების კლების ტენდენცია იკვეთება, თუმცა ეს არ ეხება ხელფასებსა და საწვავზე დანახარჯებს. შარშანდელის მსგავსად, სამეგრელო-ზემო სვანეთის ადმინისტრაცია სახელფასო დანამატის გაცემის მაჩვენებლით კვლავაც პირველ ადგილზეა და ასევე, ლიდერობს გახარჯული საწვავის კუთხითაც, რესტორნისა და კვების მომსახურებაზე კი მეორე ადგილს იკავებს, ნათქვამია ორგანიზაციის მიერ გამოქვეყნებულ კვლევაში.
ყველაზე მეტი მოცულობის თანხა საწვავის შესაძენად სამეგრელო-ზემო სვანეთის ადმინისტრაციაში იქნა გახარჯული, მისმა მოცულობამ 86 722 ლარი შეადგინა, რითაც 47 458 ლიტრი საწვავი (ბენზინი, დიზელი) იქნა შეძენილი;გუბერნატორებს შორის საწვავის ყველაზე დიდი ლიმიტით (ერთ თვეზე საშუალოდ 1 500 ლიტრი) სამეგრელო-ზემო სვანეთის გუბერნატორი ლევან შონია სარგებლობს, შესაბამისად, მის მიერ 2017 წლის განმავლობაში 14 356 ლიტრი საწვავი იქნა გახარჯული, რაც 3 434 ლიტრით ნაკლებია წინა წლის მაჩვენებელთან (17 790 ლიტრი) შედარებით.ყველაზე მეტი ხარჯი კი რესტორნისა და კვების მომსახურებაზე იმერეთის ადმინისტრაციამ გაიღო, ჯამში 13 866 ლარის ოდენობით, შემდეგი კი სამეგრელო-ზემო სვანეთის ადმინისტრაცია მოდის 11 660 ლარი. სახელმწიფო რწმუნებულების-გუბერნატორების ადმინისტრაციების მიერ 2017 წელს, წინა წელთან შედარებით, გაცემული პრემია-დანამატებისა და საკომუნიკაციო ხარჯების მოცულობები შემცირდა, თუმცა მიუხედავად ამისა, პრობლემურ საკითხად რჩება ცალკეული თანამდებობის პირებზე დანამატების ყოველთვიურად გაცემის პრაქტიკა.