რიგაში ევროკავშირის „აღმოსავლეთის პარტნიორობის“ სამიტის მეორე, დასკვნითი დღე მიმდინარეობს. დღეს გახდება ცნობილი, რა ჩაიწერება სამიტის დეკლარაციაში ვიზალიბერალიზაციასთან და სხვა საკითხებთან დაკავშირებით, თუმცა. საქართველოს დელეგაციას ამასთან დაკავშირებით რაიმე ახლო პერსპექტივისა და კონკრეტული მოლოდინის იმედი აღარ შეიძლება ჰქონდეს. უფრო მეტიც – თუკი სამიტის დეკლარაციის პროექტი,რომელიც საქართველოსთვის, მოლდოვისა და უკრაინისთვის მნიშნელოვან სიახლეს არ შეიცავს, არ შეიცვალა, იგი გაცილებით სუსტი იქნება, ვიდრე წინა, ვილნიუსის სამიტის დოკუმენტი“
მიუხედავად ამისა, საქართველოს პრემიერ-მინისტრმა ირაკლი ღარიბაშვილმა, "აღმოსავლეთის პარტნიორობის" სამიტში მონაწილე დელეგაციების ხელმძღვანელების ოფიციალურ მიღებაზე, ქართული და უცხოური მედიასაშუალებების წარმომადგენლებთან საკმაოდ ოპტიმისტური განცხადება გააკეთა: ,,იმედი მაქვს, ძალიან მალე ჩვენს მოქალაქეებს უვიზო მიმოსვლის საშუალება ექნებათ“.. შესაძლოა ამ ოპტიმიზმის საფუძველი იყოს ის, რომ პროექტის ერთ-ერთ პუნქტში დეკლარირებულია აღმოსავლეთის პარტნიორი ქვეყნების „ევროპული პერსპექტივა“ და „ევროპული არჩევანით დაინტერესება“, რაც გარკვეულწილად, უვიზო მიმოსვლის საკითხის გადავადების ერთგვარ კომპენსაციად უნდა ჩაითვალოს.თუმცა საკითხავია, დარჩება თუ არა ეს პუნქტი დეკლარაციის ბოლო რედაქციაში.
ღარიბაშვილი აცხადებს, რომ გუშინ გამართულ მაღალი დონის შეხვედრებზე გამოვლინდა, რომ საქართველოს პროგრესი ყველასათვის თვალსაჩინოა, განსხვავებული მოსაზრება აქვს პოლიტიკოსებისა და ექსპერტების მნიშვნელოვან ნაწილს: „გვითხრეს ძალიან ნათლად, რომ გვაქვს შესასრულებელი ბევრი რამ, თუ არ დავაკმაყოფილებთ ამ კრიტერიუმებს, არ იქნება უვიზო მიმოსვლა. ეს საქართველოს მთავრობის მარცხია და ეს არის იმის მიზეზი, რომ რიგაში არ იქნა პოლიტიკური გადაწყვეტილება მიღებული,“-აცხადებს ,,თავისუფალი დემოკრატების" წარმომადგენელი მაია ფანჯიკიძე.
„ნაციონალურიმოძრაობის“ წევრი გიორგი კანდელაკი აცხადებს, რომ მთავრობის დაპირებები სიცრუე აღმოჩნდა .,,ტყუილია,თითქოს მთავრობა არ პირდებოდა ხალხს, რომ რიგის სამიტზე გაფორმდებოდა ეს ყველაფერი. თქვენ შეგიძლიათ ამოიღოთ ღარიბაშვილის, წულუკიანის, სხვა მინისტრების გამოსვლები, რომლებიც სწორედ რიგაში პირდებოდნენ ჩვენს მოქალაქეებს გარღვევას ამ მიმართულებით, თუმცა, მათი ეს დაპირება, სამწუხაროდ, ყველა სხვა დაპირებასთან ერთად, აღმოჩნდა სიცრუე," – ამბობს იგი.