პრეზიდენტის ინიციატივას არაძალადობრივ დანაშაულებებთან მიმართებაში შეწყალების წესის შეცვლის და ჰუმანიზაციის შესახებ არაერთგვაროვნად აფასებენ .
,, ჩემთვის, როგორც შეწყალების კომისიის წევრისთვის და ანტიკორუფციული ორგანიზაციის ხელმძღვანელისთვის, სამოხელეო დანაშაულის, განსაკუთრებით კი კორუფციულ ქმედებებში მსჯავრდებული პირების მიმართ ჰუმანურ დამოკიდებულებასთან დაკავშირებით გადაწვეტილება მიუღებელია, – აცხადებს ”საერთაშორისო გამჭვირვალობა – საქართველოს” აღმასრულებელი დირექტორი ეკა გიგაური. ამასთან,იგი ეთანხმება გადაწყვეტილების იმ ნაწილს, რომელიც ნარკოტიკების მომხმარებლების მიმართ ლოიალური და ჰუმანური პოლიტიკის გატარებას ეხება.
”ჩვენ ვეთანხმებით ნარკოტიკების მომხმარებლების მიმართ ლოიალური და ჰუმანური პოლიტიკის გატარებას, მაგრამ სამოხელეო დანაშაულის, განსაკუთრებით კი კორუფციულ ქმედებებში მსჯავრდებული პირების მიმართ ცვლილებების შემოთავაზება კი მიუღებელიც და მოულოდნელიც კი აღმოჩნდა. სისტემური კორუფციული დანაშაული გავლენას ახდენს სახელმწიფოს უნარზე შეასრულოს თავისი საბაზისო ფუნქციები, მათ შორის დანაშაულთან ბრძოლა, ჯანმრთელობის დაცვისა და სოციალური პროგრამების დაფინანსება და სხვა, რაც აისახება თითოეული მოქალაქის ყოველდღიურ ყოფაზე. ჩვენ ასეთი ვითარება უახლოეს წარსულში გვქონდა და ქვეყანამ ამას დიდი ძალისხმევის შედეგად დიდწილად დააღწია თავი. დღეს, როდესაც კვლავაც გამოწვევად რჩება ელიტურ კორუფციაზე ეფექტურად რეაგირება და დამნაშავეთა დასჯა, სამოხელეო დანაშაულზე ლოიალური მიდგომის შემოთავაზება მცდარი და საშიში გზავნილია”, – განაცხადა ეკა გიგაურმა.
სახალხო დამცველი ნინო ლომჯარია მიესალმება პრეზიდენტის ინიციატივას ნარკოდანაშაულთან დაკავშირებით, თუმცა სამოხელეო დანაშაულთან დაკავშირებით კითხვები აქვს.
ომბუდსმენის თქმით, ამ ტიპის დანაშაულების განხილვისას კომისია ფრთხილი უნდა იყოს.
,,მიმაჩნია, რომ მთელი რიგი დანაშაულები, რასაც სამოხელეო დანაშაული აერთიანებს, მათ შორის იგივე კორუფცია, უფლებამოსილების გადამეტება, მისი ბოროტად გამოყენება, მართლმსაჯულების ინტერესების წინააღმდეგ გარკვეული მოქმედებები – ასეთი ტიპის დანაშაულები ძალიან მნიშვნელოვნად აზიანებს ადამიანის უფლებების მდგომარეობას ქვეყანაში, ამიტომ ალბათ ამ ტიპის დანაშაულების მიმართ კომისია გაცილებით უფრო ფრთხილი უნდა იყოს. მე, როგორც ამ კომისიის წევრი, თითოეულ საქმეს ინდივიდუალურად მივუდგები, ისე, რომ არ მოხდეს ამ ტიპის დანაშაულის მიმართ ლიბერალური მიდგომები ქვეყანაში, ვფიქრობ, რომ პირიქით, მთელ რიგ შემთხვევაში სისხლის სამართლის პოლიტიკა კიდევ უფრო გასამკაცრებელია და პირიქით, გვაქვს პრეტენზიები რომ ამ ტიპის დანაშაულების ეფექტური გამოძიება არ ხდება”, – განაცხადა ნინო ლომჯარიამ.
შეგახსენებთ, რომ, დღეს გავრცელებული ოფიციალური ინფორმაციით , პრეზიდენტის ინიციატივით, არაძალადობრივ დანაშაულებებთან მიმართებაში შეწყალების წესი იცვლება და უფრო ჰუმანური ხდება.