ოპერაცია „ზეთისხილის ტოტი“ იქამდე გაგრძელდება, ვიდრე სრულად არ აღმოიფხვრება ტერორიზმის საფრთხე რეგიონში და ოპერაციის ჩასატარებლად თურქეთს არავისგან არ სჭირდება თანხმობა. – წერს თურქეთის პრეზიდენტი რეჯეფ თაიფ ერდოღანი საკუთარი „ტვიტერის“ გვერდზე.
პრეზიდენტის თქმით, ოპერაცია სირიის ჩრდილოეთიდან თურქეთის მიმართ წლების განმავლობაში განხორციელებული შეტევების პასუხს წარმოადგენს.
„ოპერაცია აფრინში არა მარტო თურქეთის ინტერესების დაცვისკენ, არამედ სირიის ტერიტორიული მთლიანობის უზრუნველყოფაში საკუთარი წვლილის შეტანის, სირიელი ხალხის უსაფრთხოებისა და დაცვისკენაა მიმართული. იდლიბსა და აფრინში სტაბილურობდა დამყარდება, ასობით ათას სირიელს ექნება შესაძლებლობა უსაფრთხოების პირობებში იცხოვროს საკუთარ მიწაზე“, – წერს ერდოღანი.
19 იანვარს თურქეთის შეიარაღებულმა ძალებმა ქურთების დაჯგუფებებზე სირიაში, აფრინის რაიონში შეტევა მიიტანეს. გუშინ თურქეთის ძალები სირიის ტერიტორიაზე შევიდნენ და ოპერაციის სახმელეთო ნაწილის განხორციელება დაიწყეს.
