უკრაინის დაზვერვის მთავარი სამმართველოს ხელმძღვანელის ინფორმაციით, უკრაინელების მიერ ოკუპირებულ სევასტოპოლში რუსეთის შავი ზღვის ფლოტის შტაბ-ბინაზე განხორციელებულ თავდასხმას სულ მცირე 9 ადამიანი ემსხვერპლა, ხოლო 16 დაშავდა.
როგორც კირილ ბუდანოვმა განაცხადა, დაშავებულებს შორის არიან რუსი გენერლებიც. მათ შორის გენერალ-პოლკოვნიკი ალექსანდრ რომანჩუკი, რომლის მდგომარეობაც მძიმეა; შტაბის უფროსი, გენერალ-ლეიტენანტი ოლეგ ცეკოვი – ის უგონო მდგომარეობაშია.
თუმცა, ბუდანოვი არ ადასტურებს რუსეთის შავი ზღვის ფლოტის მეთაურის, ადმირალ ვიქტორ სოკოლოვის, სავარაუდო დაღუპვის შესახებ გავრცელებულ ინფორმაციას. მისივე თქმით, დაშავებული რიგითი სამხედრო მოსამსახურეების რაოდენობა ამ დრომდე დგინდება.
ცნობისთვის, დროებით ოკუპირებულ სევასტოპოლში რუსეთის შავი ზღვის ფლოტის შტაბ-ბინაზე თავდასხმა 22 სექტემბერს განხორციელდა. ადგილზე მყოფების მიერ გავრცელებული ვიდეოების თანახმად, შტაბს, სულ მცირე, ორი რაკეტა მოხვდა.