უკრაინის დამოუკიდებლობის დღესთან დაკავშირებით გაკეთებული მიმართვის დროს პრეზიდენტმა ვოლოდიმირ ზელენსკიმ იმის შესახებ ისაუბრა, რას ნიშნავს უკრაინისთვის დამოუკიდებლობა და რა ფასად უჯდება მისთვის ბრძოლა. მან მადლობა გადაუხადა ადამიანებს, ვინც, მისი თქმით, “უკრაინას დამოუკიდებლობას აძლევს”:
“ეს არის თავისუფალი ხალხის დღესასწაული. ძლიერი ხალხის დღესასწაული. ღირსეული ხალხის დღესასწაული. თანასწორების დღესასწაული. უკრაინელი კაცებისა და ქალების დღესასწაული. ეს თითოეული ჩვენგანისთვის დიდი ფასეულობაა და სწორედ ამისთვის ვიბრძვით და ამ ბრძოლაში ყველა მნიშვნელოვანია.
იმიტომ რომ ეს არის ბრძოლა, რომელიც მნიშვნელოვანია ყველასთვის. ეს არის ბრძოლა უკრაინის თავისუფლებისთვის. დიდ ომში პატარა საქმეები არ არსებობს. აქ არ არსებობს უმნიშვნელო და არასაჭირო რამ და ეს ეხება როგორც ადამიანებს, ასევე საქმეებსა და სიტყვებს. როდესაც ჩვენ აღვნიშნავთ უკრაინის დამოუკიდებლობას, ყველას შეუძლია ამ ზეიმის ნაწილად იგრძნოს თავი. ყველას შეუძლია საკუთარ თავს ჰკითხოს:
“სად ვდგავარ მე უკრაინის დამოუკიდებლობაში? რა გავაკეთე მე უკრაინის დამოუკიდებლობისთვის? რა შევმატე მე უკრაინის დამოუკიდებლობას?”
დღეს მე მინდა მივულოცო იმ ადამიანებს, ვინც უკრაინას დამოუკიდებლობას აძლევს. ესენი არიან მეომრები, რომლებიც ქვეყნის დასაცავად დადგნენ და მე მადლობას ვუხდი თითოეულ ჯარისკაცსა და მეზღვაურს, თითოეულ სერჟანტს, ოფიცერსა და გენერალს, ასევე უკრაინელი ჯარისკაცის თითოეულ მამასა და დედას, ყველა ოჯახს”, – განაცხადა ვოლოდიმირ ზელენსკიმ.