მეგის ქარდავას საქმეებზე სასამართლო სხდომები შესაძლოა, აღარ გაიმართოსმანამ, სანამ მისი ექსტრადირება არ მოხდება . ამის შესახებ ქარდავას ადვოკატმა მალხაზ ველიჯანაშვილმა თქვა. ინფორმაციას 1tv ავრცელებს.
სისხლის სამართლის საპროცესო კოდექსის მიხედვით, ბრალდებულის გარეშე სხდომის ჩატარება დასაშვებია მხოლოდ მაშინ, როდესაც ბრალდებული თავს არიდებს სასამართლო პროცესზე გამოცხადებას.
იქიდან გამომდინარე, რომ ქარდავას უკრაინაში წინასაექსტრადიციო პატიმრობა აქვს შეფარდებული, მისი პოზიცია საქართველოში სხდომის ჩატარებასთან დაკავშირებით არ არის ცნობილი.
"დღევანდელი მდგომარეობით, ის თავს არ არიდებს პროცესს, ეს შეუძლებელია. შესაბამისად, მის გარეშე სხდომის გამართვის უფლება სასამართლოს არ აქვს", – განაცხადა მალხაზ ველიჯანაშვილმა.
თავდაცვის სამინისტროს სამხედრო პოლიციის დეპარტამენტის ყოფილი უფროსი მეგის ქარდავა, ხუთწლიანი სამძებრო ღონისძიების შემდეგ, უკრაინაში, ქალაქ ივანო ფრანკოვსკში 1 ნოემბერს დააკავეს.