პანკისის ხეობის სოფელ დუისში ჩატარებული სპეცოპერაციის დროს დაჭრილი თემირლან მაჩალიკაშვილის ჯანმრთელობის მდგომარეობა გაუარესებულია. ის წმინდა მიქაელ მთავარანგელოზის სახელობის კლინიკის რეანიმაციულ განყოფილებაშია მოთავსებული.
საავადმყოფოს კლინიკური მენეჯერი ზაზა ლურსმანაშვილი აცხადებს, რომ ბოლო ანალიზების შედეგად უარყოფითი დინამიკა ვლინდება. მისივე თქმით, ექიმები წნევისა და სხვა სასიცოცხლო მონაცემების დაბალანსებას მედიკამენტების მეშვეობით ცდილობენ.
„ექიმს ვესაუბრე ერთი ნახევარი საათის წინ, მდგომარეობა ისევ მძიმედ რჩება, კრიტიკულად, კარგობისკენ არაფერია, ამიტომ გვინდა მის მკურნალობაში სხვა ექიმებიც ჩაერთონ “ – აცხადებს დაჭრილის მამა მალხაზ მაჩალიკაშვილი. – ამ ექიმების იმედიც მაქვს, მაგრამ დამატებით მინდა და ამათაც უნდათ, რომ სხვა სპეციალისტი იქნებ გამოჩნდეს, რომ რაღაც უკეთესობისკენ იყო. ყველამ უნდა გადავარჩინოთ. მეც საქართველოს შვილი ვარ, ისიც საქართველოს შვილია. ჩვენ, ამ კლინიკის ხელმძღვანელებთან ერთად მოვილაპარაკეთ, ისინი წინააღმდეგი არ არიან, თვითონ იძახიან, რომ ერთობლივად შეიძლება უფრო კარგად გავართვათ თავი და მოიწვიეთო. ამის გამო, ევროპაში, თურქეთში, რუსეთში მოვიძიეთ ექიმები და შევარჩიეთ ყველაზე ძლიერი რომელიც არის. ქართველია ექიმი და მგონი ორნი უნდა ჩამოვიდნენ, რუსი და ქართველი. ველოდები, მოსკოვიდან უნდა ჩამოვიდეს, ახალი წლები დაემთხვა და შეიძლება დღესაც ჩამოვიდეს, შეიძლება ახალი წლის მერე“.
მალხაზ მაჩალიკაშვილის თქმით, ექიმს გუშინ გადაუგზავნეს დაჭრილის მდგომარეობასთან დაკავშირებული ჩანაწერები და დისკები.