საქართველოს საგარეო საქმეთა სამინისტროს ინფორმაციით, გერმანიის ბუნდესტაგის წევრი, საგარეო საქმეთა სამინისტროს კოორდინატორი სამხრეთ კავკასიის, მოლდოვის რესპუბლიკისა და ცენტრალური აზიის ქვეყნების საზოგადოებათშორისი თანამშრომლობის საკითხებში, რობინ ვაგენერი ორდღიანი ვიზიტით საქართველოს ეწვია.
უწყების ცნობით, ვიზიტის ფარგლებში შეხვედრები გაიმართება საგარეო საქმეთა მინისტრ ილია დარჩიაშვილთან, საქართველოს პარლამენტის სხვადასხვა კომიტეტების თავმჯდომარეებთან, ასევე სხვა დეპუტატებთან და სამოქალაქო საზოგადოების წარმომადგენლებთან.
საქართველოში ჩამოსვლამდე ბატონმა ვაგენერმა განაცხადა:
“საქართველოში მივემგზავრები, რათა მკაფიო გავხადო, რომ გერმანია მხარს უჭერს საქართველოს ევროპულ პერსპექტივას. სხვადასხვა სფეროს წარმომადგენლებთან ვისაუბრებ იმაზე, თუ როგორ შეიძლება ეს პერსპექტივა რეალობად იქცეს. ამასთან ნათელია, რომ ევროკავშირისაკენ მიმავალი გზა მარტივი არ არის. ჩვენ დავინახეთ, რომ აუცილებელი რეფორმების გატარება არ არის ადვილი და ხანდახან წინააღმდეგობებს აწყდება. ვაღიარებ იმ ნაბიჯებს, რომლებიც მთავრობამ 12 პრიორიტეტის შესასრულებლად გადადგა, მაგრამ ჯერ კიდევ ბევრი რამ არის გასაკეთებელი. ამის შესახებ ვისაუბრებ მთავრობის, პარლამენტისა და სამოქალაქო საზოგადოების წარმომადგენლებთან”.