გუშინ, 18 დეკემბერს თეთრმა სახლმა აშშ-ის ეროვნული უსაფრთხოების სტრატეგიის განახლებული ვარიანტი გამოაქვეყნა.
ამასთან დაკავშირებით გამართულ პრესკონფერებციაზე პრეზდენტმა დონალდ ტრამპმა განაცხადა, რომ სტრატეგია ოთხ მთავარ ფუნდამენტზე დგას: "სამშობლოს დაცვა, ამერიკული კეთილდღეობის განვითარების ხელშეწყობა, მშვიდობის იძულება და მსოფლიოს კონკურენციაში ამერიკის გავლენის გაძლიერება."
68-გვერდიან დოკუმენტში საუბარია იმ გლობალურ საფრთხეებზე, რომელიც აშშ-ის წინაშე დგას, ასეთად კი ვაშინგტონი პირველ რიგში რუსეთსა და ჩინეთს განიხილავს, საფრთხედ განიხილება ირანისა და ჩრდილოეთ კორეის საგარეო პოლიტიკაც, ასევე "ისლამური სახელმწიფო" და "ალ-ქაიდა".
აღსანიშნავია, რომ სტრატეგიის დოკუმენტში კლიმატის ცვლილება საფრთხეებს შორის აღარ არის დასახელებული.
დოკუმენტში საქართველოც არის ნახსენები. კერძოდ, ნათქვამია, რომ რუსეთმა საქართველოსა და უკრაინაში შეჭრით რეგიონში სახელმწიფოების სუვერენიტეტის დარღვევისთვის მზადყოფნის დემონსტრირება მოახდინა.
"რუსეთი აგრძელებს მეზობელი ქვეყნების დაშინებას მუქარის შემცველი ნაბიჯებით, მათ შორის ბირთვული პოტენციალის გაძლიერებით და შეტევითი ხასიათის შეიარაღების განთავსებით," – წერია დოკუმენტში.