“ერთიანი ნაციონალური მოძრაობის” დეპუტატის, ანა წითლიძის თქმით, ფრაქცია პარლამენტში ინტერპელაციის წესით განათლების მინისტრს დაიბარებს. დეპუტატებს გიორგი ამილახვართან კითხვები სკოლებში უფასო კვების დანერგვასთან დაკავშირებით აქვთ.

გარდა ამისა, როგორც წითლიძემ აღნიშნა, ენმ-მ მოამზადა ანგარიში, რომელშიც საჯარო სკოლებში უფასო კვების დანერგვასთან დაკავშირებით პროგრამა არის გაწერილი. დეპუტატებს სურთ მინისტრს პარლამენტში აღნიშნული ანგარიში წარუდგინონ.

“ეს ანგარიში გაწერილი პროგრამაა და ეხება უფასო კვების დანერგვას საჯარო სკოლებში. ამავე თემასთან დაკავშირებით ჩვენ პარლამენტში ინტერპელაციის წესით დავიბარებთ საქართველოს განათლებისა და მეცნიერების მინისტრს. თქვენ იცით, რომ წლებია განათლების სამინისტრო ამბობს, რომ ამ თემასთან დაკავშირებით მუშაობს, თუმცა ჩვენ არცერთი კონკრეტული ნაბიჯი არ გვნახავს, რა ქნა ამასთან დაკავშირებით განათლების სამინისტრომ. ჩვენ, გარდა იმისა, რომ კითხვები გვექნება ინტერპელაციის წესით დაბარებულ მინისტრთან, ასევე წარვუდგენთ და გადავცემთ ჩვენს მიერ შემუშავებულ ანგარიშს და პროგრამას, რომელშიც დეტალურადაა გაწერილი, როგორ უნდა მოხდეს უფასო კვების დანერგვა საჯარო სკოლებში, რა დაუჯდება ეს საქართველოს ბიუჯეტს, როგორ უნდა მოახერხოს სახელმწიფომ მისი ადმინისტრირება”, – თქვა ანა წითლიძემ.