მარიუპოლის მერის მრჩევლის, პეტრო ანდრიუშჩენკოს ინფორმაციით, რუსი სამხედრო მაღალჩინოსანი, რომელმაც მარიუპოლის განადგურების ბრძანება გასცა, რუსეთის ფედერაციის 960-ე თავდასხმის საავიაციო პოლკის სამხედრო ნაწილის მეთაური, პოლკოვნიკი სერხიი ატროშჩენკოა.

ატროშჩენკოს მიმოწერა და მონაცემები უკრაინის კიბერ წინააღმდეგობის ჯგუფმა და საერთაშორისო სადაზვერვო საზოგადოებამ InformNapalm-მა გამოაქვეყნა

„მარიუპოლის მოსახლეობის ნომერ პირველი მკვლელი იდენტიფიცირებულია. ვინც გასცა ბრძანება და აკონტროლებდა დრამატული თეატრის, სამშობიარო და ბავშვთა საავადმყოფოს დაბომბვას. პირველი კვირებიდან დავადგინეთ, რომ თვითმფრინავები, რომლებმაც დაბომბეს მარიუპოლი აფრინდა პრიმორსკო-ახტარსკის აეროდრომიდან“, – წერს ანდრიუშჩენკო.

სწორედ ქალაქ პრიმორსკო-ახტარსკის გარეუბანში (რუსეთის ფედერაციის კრასნოდარის ტერიტორია, აზოვის ზღვის სანაპირო) იყო განლაგებული ატროშჩენკოს სამხედრო ნაწილი.

InformNapalm ავრცელებს სრულ მონაცემებსა და ინფორმაციას, ატროშჩენკოს ამჟამინდელი საცხოვრებელი ადგილის შესახებ, ასევე მის ტელეფონის ნომრებსა და პირად მეილს.

ოფიციალური მონაცემებით, მარიუპოლის თეატრზე ავიაიერიშის შედეგად, რომელიც გასული წლის 16 მარტს მოხდა, 300-მდე ადამიანი დაიღუპა.

ქალაქი რუსების მრავალთვიანი ბლოკადის შემდეგ, ამჟამად ოკუპირებულია და თითქმის სრულადაა განადგურებული. რუსულმა აგრესიამ მარიუპოლს ჰუმანიტარული კატასტროფა მოუტანა.