“პოლიტიკო” წერს, რომ უკრაინის დელეგაცია ბაიდენთან შეხვედრაზე მოითხოვს ATACMS რაკეტებს, რომელთა საფრენი მანძილი 300 კმ-მდეა, ასევე, ვოლოდიმირ ზელენსკი დააყენებს სადაზვერვო და დამრტყმელი დრონების Grey Eagle და Reaper გადაცემის მოთხოვნას.
როგორც “ფოქს ნიუსის” ჟურნალისტი ნანა საჯაია წერს, ვოლოდიმირ ზელენსკი კონგრესს ვაშინგტონის დროით 19:30-ზე მიმართავს (თბილისის დროით – დილის 5:30). უკრაინის პრეზიდენტის სიტყვა, დაახლოებით, 20-25 წუთიანია და პრეზიდენტი მას ინგლისურად წარმოთქვამს. იქნება რამდენიმე ფრაზა უკრაინულადაც.
სხვა დეტალები: ვოლოდიმირ ზელენსკის თეთრ სახლში 14:00 საათზე (თბილისის დროით 23:00) ელოდებიან.
* კონგრესში სიტყვით გამოსვლამდე, მას პრეზიდენტი ბაიდენი თეთრ სახლში უმასპინძლებს;
* დღესვე გამოცხადდება უკრაინის დახმარების ახალი პაკეტი (2 მილიარდი დოლარი), რომელიც პატრიოტის სარაკეტო სისტემას მოიცავს;
* თეთრი სახლის შეხვედრის შემდეგ იქნება ბრიფინგი, ვაშინგტონის დროით 16:30-ზე.
* დღის ბოლოს ზელენსკი სიტყვით კონგრესს მიმართავს;
* ზელენსკი ვაშინგტონში პრეზიდენტმა ბაიდენმა ბოლო სატელეფონო საუბრისას, გასულ კვორას, მიიწვია;
* 24 თებერვლის შემდეგ ეს ზელენსკის პირველი უცხოური ვიზიტია.
ამავე დროს, სი ენ ენი წერს, რომ ჯო ბაიდენი მზადაა ვოლოდიმირ ზელენსკისთან ერთად განიხილოს თავისი წარმოდგენა “სამართლიან მშვიდობაზე” რითაც უნდა დასრულდეს კონფლიქტი უკრაინაში, – წყაროდ გამოცემა ასახელებს ჯონ კირბის, უშიშროების საბჭოში სტრატეგიული კომუნიკაციების კოორდინატორს.
“პრეზიდენტი ბაიდენი მიიჩნევს, რომ ზამთრის დადგომასა და ომის ახალ ფაზაში გადასვლასთან ერთად, ეს იქნება შესაძლებლობა ორივე ლიდერისთვის, შეხვდეს პირისპირ და განიხილონ არამარტო ის, თუ რას აკეთებს ახლა აშშ და რას გააკეთებს მომავალში, არამდე იმაზეც ჩამოყალიბდნენ, რასაც ვოლოდიმირ ზელენსკიმ “სამართლიანი მშვიდობა” უწოდა”, – განაცხადა კირბიმ.