უკრაინის შეიარაღებული ძალების მთავარსარდალმა ვალერი ზალუჟნიმ მონაწილეობა მიიღო აქციაში “გახდი წმინდა ნიკოლოზი ბიჭუნასთვის, რომელიც ომმა მამას დააშორა” და ამ გზით ერთ-ერთი მებრძოლის შვილის ოცნება აასრულა.
ამის შესახებ ბავშვის დედამ ელენა ვარფოლომეევამ მედიას უამბო. მისი თქმით, როცა ის შვილთან ერთად მიიწვიეს ამ აქციაში მონაწილეობის მისაღებად და წერილის დაწერა სთხოვეს, ბიჭმა წერილში დაწერა, რომ ძალიან უნდოდა, ომში წასული მამამისი ეპოვნა და რომ ვალერი ზალუჟნისთან შეხვედრაზე ოცნებობდა.
ცოტა ხანში დედას დაურეკეს და უთხრეს, რომ მის შვილს ივანს ვალერი ზალუჟნი შეხვედრაზე ელოდებოდა.
“გუშინ ჩემს შვილს ვალერი ზალუჟნი ეხვეოდა. ასე, ალბათ, მამამისი თუ მოეფერებოდა. და როცა დრო მოვა, ივანი აუცილებლად უჩვენებს ამ ფოტოს მამამისს. მართალია, მისი მთავარი ნატვრა მამის პოვნაზე ჯერაც ასახდენია, მაგრამ ვალერი ზალუჟნისთან შეხვედრით მოხდა ის, რაც ყველაზე მთავარია: ჩემს შვილს რწმენა მიეცა, რომ მამას აუცილებლად იპოვნის! მჯერა, რომ აუცილებლად მოხდება ისე, როგორც ჩვენ გვინდა – რასაც ნატრობ, იმის ახდენის უნდა გჯეროდეს და აი, ჩვენ გვჯერა!”, – თქვა ივანის დედამ.