ეროვნული ვალუტის გაუფასურება  სულ უფრო  მძიმედ  აისახება მოსახლეობის სოციალურ ყოფაზე. განსაკუთრებით სავალალო მდგომარეობაში არიან ისინი, ვისაც საბანკო სესხები დოლარში აქვთ  აღებული ან აუცილებლობა აიძულებს ახლა  აიღონ. 

ეროვნულ ვალუტაში გაცემული სესხები კიდევ უფრო გაძვირდა –  ფიზიკური პირებისთვის  განაკვეთი 2.1%-ით გაიზარდა და 24.5%-ს მიაღწია. დოლარში გაცემულ სესხებზე განაკვეთი კი 0.1%-ით შემცირდა და 10.9%-ს გაუტოლდა.  ამას ემატება ისიც, რომ კომერციული ბანკები პრევენციისთვის სესხებს გასცემენ ლარში, თუმცა უკან იბრუნებენ დოლარის კურსით. ბანკები ამას ლარის დევალვაციით ამართლებენ.

საქართველოს ეროვნული ბანკის მონაცემებით,  სექტემბერში ეროვნულ ვალუტაში 90 მილიონ ლარამდე სესხი გაიცა, თუმცა ლარში გაცემული  სესხების წილი ისევ მკვეთრად დაბალია და მხოლოდ 36%-ს (5,5 მლრდ ლარი), ხოლო დოლარებში გაცემულისა – 64% -ს შეადგენს. ეს აიხსნება იმით, რომ  ბანკებმა  და საფინანსო ორგანიზაციებმა კარგად იციან, რომ მათ აღარ უნდა  გასცენ  ისეთი მოცულობის თანხა, რომელიც გარკვეული დროის შემდეგ გაუფასურდება.

.