საქართველოს სოფლის მეურნეობის მინისტრმა ოთარ დანელიამ დღეს გამართულ ბრიფინგზე ციტრუსის სეზონის დაწყების თაობაზე ისაუბრა.სამინისტროში მიიჩნევენ, რომ მიმდინარე წელს ციტრუსის სავარაუდო მოსავალი 100 ათას ტონაზე მეტი იქნება, რაც   40 პროცენტით აღემატება შარშანდელს. შესაბამისად სამინისტროს დაგეგმილი აქვს მხარდამჭერი ღონისძიებები, რომლებიც მოსახლეობას დაეხმარება მოსავლის  რეალიზაციაში. მანდარინის რეალიზაციის ხელშემწყობი პროგრამის ბიუჯეტი 2 მილიონი ლარია, სახელმწიფო პროგრამა 2016 წლის 1 თებერვლამდე გაგრძელდება. 

მინისტრის თქმით, "ნარინჯისფერი რთველის" ორგანიზებულად ჩატარების მიზნით ბათუმში სავაჭრო-სამრეწველო პალატის შენობაში საკოორდინაციო შტაბი გაიხსნება. 9.00-დან 21.00 საათამდე იმუშავებს ცხელი ხაზი.  

წელს ამ  პროცესში ჩაერთვება სამი-ოთხი საერთაშორისო სტანდარტების შესაბამისი ქარხანა. გაუმჯობესებულია ლოჯისტიკური მდგომარეობა. დამატებულია სატრანსპორტო საშუალებები, რის გამოც, ექსპორტი უფრო შეღავათიანი პირობებით იქნება შესაძლებელი. ქართული ციტრუსი ექსპორტზე უკრაინაში, რუსეთში, ბელარუსში, ყაზახეთში, ყირგიზეთში, სომხეთში და აზერბაიჯანში გავა.

ხორციელდება სამრეწველო გადამუშავებისთვის განკუთვნილი  (არასტანდარტული) მანდარინის რეალიზაციის ხელშემწყობი ღონისძიებები.  გასული წლის მსგავსად კომპანიები, რომლებიც ერთ კილოგრამ არასტანდარტულ მანდარინს არანაკლებ 20 თეთრად შეისყიდიან, 10 თეთრის ოდენობით სახელმწიფო სუბსიდიას მიიღებენ.  ამას გარდა, კომპანიებს აქვთ საშუალება აიღონ შეღავათიანი კრედიტები, კრედიტის   პროცენტის თანადაფინანსებას სოფლის მეურნეობის პროექტების მართვის სააგენტო განახორციელებს.