რუსეთის საკონსტიტუციო სასამართლომ ქვეყნის მიერ ოკუპირებული ტერიტორიების რუსეთის ფედერაციასთან შეერთების შესახებ ხელშეკრულებები კონსტიტუციურად აღიარა. საუბარია უკრაინის ოთხი რეგიონის: ლუგანსკის, დონეცკის, ზაპოროჟიესა და ხერსონის ანექსიიაზე.
შეგახსენებთ, რომ 30 სექტემბერს კრემლში ოთხ დოკუმენტს ხელი მოაწერეს ვლადიმერ პუტინმა და საოკუპაციო ტერიტორიების ე.წ. ხელმძღვანელებმა.
პუტინმა მიმართა საკონსტიტუციო სასამართლოს, როგორც ამას მოითხოვს კანონი „რუსეთის ფედერაციის საერთაშორისო ხელშეკრულებების შესახებ“ – ეს აუცილებელია რუსეთის პარლამენტის მიერ მათ რატიფიცირებამდე.
როგორც BBC წერს, საკონსტიტუციო სასამართლოს ვებგვერდზე, მიღებული განცხადებების ბაზაში, 2 ოქტომბრის შუაღამის შემდეგ პუტინის ოთხი დოკუმენტი არა მხოლოდ დარეგისტრირდა, არამედ უკვე მიღებულ იქნა განსახილველად. ეს ნიშნავს, რომ მოსამართლეებმა საგანგებო სხდომა ღამით გამართეს.