ფინანსთა სამინისტროს ცნობით, გუშინ, 26 ოქტომბერს ხელი მოეწერა ხელშეკრულებას  საქართველოსა და აზიის განვითარების ბანკს შორის,  „ურბანული მომსახურების გაუმჯობესების საინვესტიციო პროგრამის ფარგლებში''  კიდევ ერთი პროექტის დაფინანსების  შესახებ.

ხელშეკრულების თანახმად,  2016 წელს ქალაქ ზუგდიდში კანალიზაციის სისტემის, ხოლო  მესტიაში კანალიზაციის გამწმენდი ნაგებობის მშენებლობა დაიწყება.  სამშენებლო სამუშაოებს აზიის განვითარების ბანკი დააფინანსებს,   საამისოდ იგი  75 მილიონ ლარს გამოყოფს.  სამშენებლო სამუშაოები 2019 წელს უნდა დასრულდეს. 

ცნობისთვის: საქართველოში 2011-2019 წლებში ურბანული მომსახურების გაუმჯობესების პროექტების დასაფინანსებლად საქართველოსა და აზიის განვითარების ბანკს (ADB) შორის 2011 წელს ხელი მოეწერა „ურბანული მომსახურების გაუმჯობესების საინვესტიციო პროგრამის“ დაფინანსების ჩარჩო ხელშეკრულებას (FFA) 500 მლნ აშშ დოლარის ოდენობის სესხზე. პროგრამა ითვალისწინებს წყალმომარაგებისა და კანალიზაციის სისტემის გასაუმჯობესებლად პროექტების განხორციელებას ქვეყნის 7 ტურისტულ ცენტრსა და მსხვილ ურბანულ დასახლებაში (მესტია, ანაკლია, ქუთაისი, ფოთი, ურეკი, ზუგდიდი, მარნეული).

FFA-ის ფარგლებში ამჟამად მიმდინარეობს 4 პროექტი ჯამურად დაახლოებით 326 მლნ აშშ დოლარის ოდენობით:

I პროექტი: მესტიაში და ანაკლიაში წყალმომარაგების სათავე ნაგებობების მშენებლობა, წყალმომარაგების სისტემების ნაწილობრივ მშენებლობა-რეაბილიტაცია ქუთაისსა (I ფაზა) და ფოთში. ურეკის წყალმომარაგებისა და კანალიზაციის სისტემების ნაწილობრივი მშენებლობა;

II პროექტი: ანაკლიასა და მესტიაში წყალმომარაგებისა და კანალიზაციის სისტემის რეკონსტრუქცია და რეაბილიტაცია;

III პროექტი: ქალაქ ქუთაისში წყალმომარაგების სისტემის რეაბილიტაცია და ურეკში წყლისა და კანალიზაციის სისტემების მშენებლობა;

IV პროექტი: ქალაქ ზუგდიდში წყალმომარაგების სისტემის მშენებლობა და ფოთში კანალიზაციის სისტემის რეაბილიტაციის სამუშაოები, მათ შორის კანალიზაციის გამწმენდი ნაგებობის მშენებლობა.