სომხეთ-აზერბაიჯანის საზღვარზე ვითარება ისევ დაიძაბა. რამდენიმე საათიანი პაუზის შემდეგ, დილიდან სროლები განახლდა. სომხეთის თავდაცვის უწყების ინფორმაციით, აზერბაიჯანულმა მხარემ უპილოტო საფრენი აპარატები, არტილერია და ნაღმმტყორცნები გამოიყენა. ოფიციალური ბაქო კი აცხადებს რომ სომხეთი აზერბაიჯანის პოზიციებზე ლაჩინისა და კელბაჯარის რაიონებში საარტილერიო დარტყმებს განაგრძობს და დაღუპულია 50 აზერბაიჯანელი სამხედრო. 49 სომეხი ჯარისკაცის გარდაცვალებაზე საუბრობს ერევანიც.
გამწვავებული ვითარების ფონზე ბაქოში ევროკავშირის სპეციალურ წარმომადგენელს ელოდებიან. ტოივო კლაარი სომხეთ-აზერბაიჯანს შორის ესკალაციის საკითხზე შეხვედრებს გამართავს.
ვითარებას გამოეხმაურა თეთრი სახლი. სპიკერის, ჯონ კირბის თქმით, აშშ ღრმად არის შეშფოთებული აზერბაიჯანი-სომხეთის საზღვარზე თავდასხმების შესახებ ცნობებით და მოუწოდებს ორივე ქვეყნის მთავრობებს აღადგინონ პირდაპირი კომუნიკაციები დიპლომატიური და სამხედრო არხებით.
გარდა ამისა, კოლექტიური უსაფრთხოების ხელშეკრულების ორგანიზაცია [ОДКБ] სომხეთში სადამკვირვებლო მისიას გაგზავნის.
შექმნილი ვითარების ფონზე კი სომხეთში პრემიერ ფაშინიანის წინააღმდეგ გამოსვლები გაიმართა. სომხეთის პარლამენტთან მისი გადადგომა მოითხოვეს.