უკრაინაში საომრად წასული კერძო სამხედრო კომპანიების დაქირავებულთა 40% დაღუპული ან დაჭრილია, – ეს ინფორმაცია უკრაინის არმიის გენშტაბმა გაავრცელა და იმის საილუსტრაციოდ, რომ კერძო სამხედრო კომპანიებს სერიოზული დანაკარგი აქვთ, ალექსანდროვკის მიმართულება მოიტანა (ხერსონის ფრონტი).
“კერძო სამხედრო კომპანიები, რომლებიც დროებით მიტაცებულ ტერიტორიებზე მოქმედებენ, ძალიან დიდ ზარალს განიცდიან. ალექსანდროვკის ტერიტორიაზე და მიმდებარედ, მოკლული და მძიმედ დაჭრილია ასეთი კერძო კომპანიის რაზმების პირადი შემადგენლობის 40%-ზე მეტი. ამასთან, ზოგჯერ ცხედრების ამოცნობაც კი ვერ ხერხდება და ისინი ფორმდებიან, როგორც უგზო-უკვლოდ დაკარბულები”, – აღნიშნულია გენშტაბის ცნობაში.
შეგახსენებთ, გუშინ უკრაინის შეიარაღებულმა ძალებმა ხარკოვისა და ხერსონის ოლქებში თითო დასახლებული პუნქტი ოკუპანტებისგან გაათავისუფლეს. ჯერჯერობით ოფიციალურად არ დადასტურებულა ინფორმაცია ბალაკლეას ალყაში მოქცევის შესახებ, თუმცა, რუსული წყაროები წერენ, რომ ქალაქი ალყაშია და უკრაინელთა ფორმირებების წინააღმდეგ მხოლოდ სამარის სპეცდანიშნულების რაზმი იბრძვის, რომელიც, რუსული წყაროების თანახმად, იარაღის დაყრასა და დანებებას არ აპირებენ.