საქართველოს მთავარი პროკურატურის ინფორმაციით, 20 წლით თავისუფლების აღკვეთა მიესაჯა კაცს, რომელიც ცოლის ოჯახის 5 წევრის მოკვლას ცდილობდა.
დაწვრილებით: ოჯახში ძალადობისა და მუქარისთვის ნასამართლევმა ს.მ.-მ არასრულწლოვანი შვილის თანდასწრებით, მეუღლეს ფიზიკური შეურაცხყოფა მიაყენა. ასევე, ბრალდებული 2021 წლის 11 დეკემბერს, მეუღლის მშობლების სახლში მივიდა, სადაც დანით დაზიანებები მიაყენა მეუღლის დედ-მამას, მეუღლის დას, მეუღლის ძმის ცოლს და ამ უკანასკნელის მცირეწლოვან შვილს. დროულად აღმოჩენილი სამედიცინო დახმარების შედეგად, დაზარალებულების გადარჩენა მოხერხდა.
პოლიციამ ბრალდებული იმავე დღეს დააკავეს. მას ბრალდება ოჯახში ძალადობის და დამამძიმებელ გარემოებებში მკვლელობის მცდელობის ჩადენისთვის წარედგინა. სასამართლომ ის სრულად სცნო დამნაშავედ, გაიზიარა რა მის მიმართ წარდგენილი ყველა ბრალდება. კაცს პატიმრობის ვადად 20 წელი განესაზღვრა.