ტელეგრამ არხებზე ვრცელდება ფოტოები მარიუპოლიდან, სადაც პუტინის დავალებით ციხის გალიებს ქუჩებში აწყობენ, რომ აზოვის პოლკის გმირების დასასჯელად საჩვენებელი სასამართლო მოაწყონ.
ამერიკის შეერთებულმა შტატებმა დაგმო რუსეთის ნებისმიერი მცდელობა, სამხედრო ტრიბუნალი მოუწყოს უკრაინის ოკუპირებულ ქალაქ მარიუპოლში დატყვევებულ სამხედროებს და დაგეგმილ პროცესს უკანონო უწოდა.
„დაგეგმილი საჩვენებელი პროცესი უკანონოა და მართლმსაჯულების დაცინვაა. ჩვენ ვგმობთ მას. კრემლი ცდილობს თავი აარიდოს პასუხისმგებლობას აგრესიულ ომზე და ყურადღება გადაიტანოს უკრაინაში რუსეთის ჯარების მიერ თებერვლის შეჭრის შემდეგ ჩადენილი სისასტიკისგან “, – ნათქვამია სახელმწიფო დეპარტამენტის ოფიციალური წარმომადგენლის, ნედ პრაისის განცხადებაში.