კოკის ადმინისტრაციულ ერთეულში დღეს ბეტონის ქარხანა გაიხსნა. პოლონური საერთაშორისო ჰოლდინგი "ტინეს კაპირალ ჯგუფი" ზუგდიდის მუნიციპალიტეტის სოფელ კოკში 3 მილიონ ამერიკულ დოლარზე მეტი ინვესტიციის განხორციელებას აპირებს. ბეტონის ქარხნის გახსნას დღეს პოლონური საერთაშორისო კომპანიის ხელმძღვანელობასთან ერთად სამეგრელო-ზემო სვანეთის გუბერნატორი ლევან შონია ადგილობრივი ხელისუფლების წარმომადგენლებთან ერთად ესწრებოდა.  ცერემონიალს ასევე ბიზნეს სექტორის წარმომადგენლებიც დაესწრნენ. ამ ეტაპზე ბეტონის ქარხანაში 45 მოქალაქეა დასაქმებული.  უახლოეს პერიოდში კომპანია გეგმავს გაზარდოს თანამედროვე ტექნოლოგიებზე დაფუძნებული ბეტონის ქარხნის წარმადობა. ჰოლდინგში აცხადებენ, რომ საქართველოში ინვესტირება არის კომპანიის საერთაშორისო საინვესტიციო სტრატეგიის ნაწილი. "ტინეს ჯგუფი" აქცენტს აკეთებს ისეთ სწრაფად მზარდ სფეროებზე, რომელიც დამახასიათებელია ევროპის, ჩრდილოეთ და ცენტრალური აფრიკის, ჩრდილო აღმოსავლეთისა და ცენტრალური  აზიის ბაზრებისთვის.